من وحي السُنّة

من وحي السُنّة: قال صلى الله عليه وسلم : ( إذا وسد الأمر إلى غير أهله فانتظر الساعة )       ***       قال صلى الله عليه وسلم : (والله ما الفقر أخشى عليكم ، ولكني أخشى أن تبسط عليكم الدنيا ، كما بسطت على من كان من قبلكم ، فتنافسوها كما تنافسوها ، وتهلككم كما أهلكتهم )       ***       قال رسول الله صلى الله عليه وسلم: (أنا زعيم ببيت في ربض الجنة لمن ترك المراء وإن كان محقا، وببيت في وسط الجنة لمن ترك الكذب وإن كان مازحا، وببيت في أعلى الجنة لمن حسن خلقه.) .

23 ديسمبر، 2009

وذكر...

السلام عليكم ورحمة الله وبركاته،

مع بداية عام هجري جديد اسأل الله أن يجعله عام خير وسعادة على جميع المسلين، ومع أول شهر من أشهر السنة ألا وهو شهر الله المحرم، وهو شهر ذو فضل خاص وعظيم فعن النبي - صلى الله عليه وسلم - أنه قال:
{ أفضل الصيام بعد شهر رمضان شهر الله الذي تدعونه المحرم، وأفضل الصلاة بعد الفريضة قيام الليل } رواه مسلم.
فهذا الشهر في حد ذاته له فضل ومكانة خاصة، كما أن به يوم من الأيام الفاضلة وهو يوم عاشوراء الذي قال فيه النبي - صلى الله عليه وسلم - :
{ أحتسب على الله أن يكفر السنة التي قبله }. رواه مسلم.

فهذه دعوة أذكر بها نفسي وإخواني بهذا اليوم والحرص على صيامه لمن استطاع، كما يفضل صيام معه يوم التاسع لمخالفة اليهود، ففي صحيح مسلم عن ابن عباس رضي الله عنهما قال: ( حين صام رسول الله - صلى الله عليه وسلم - عاشوراء وأمر بصيامه، قالوا: يا رسول الله إنه يوم تعظمه اليهود والنصارى )، فقال - صلى الله عليه وسلم -:
{ فإذا كان العام المقبل إن شاء الله صمنا التاسع } [أي مع العاشر مخالفةً لأهل الكتاب] قال: ( فلم يأت العام المقبل حتى توفى رسول الله - صلى الله عليه وسلم - .

فأذكر نفسي وإياكم بهذين اليومين:

يوم التاسع من محرم 1431 سيوافق يوم السبت القادم 26 ديسمبر 2009
يوم العاشر من محرم 1431 سيوافق يوم الأحد القادم 27 ديسمبر 2009

تقبل الله منا ومنكم

13 ديسمبر، 2009

بلاش تزمت

السلام عليكم ورحمة الله وبركاته،

كلام بنسمعه كتيير أوي من الناس وهو بلاش تزمت والدين يسر و يسروا ولا تعسروا ومتحبكهاش ومتبقاش حنبلي،... إلى آخره من الكلام ده وما شابه.

وعشان كدة أنا أنهاردة هتكلم عن الموضوع ده من خلال عدة نقاط.

النقطة الأولى: (والفكرة دي أساس التدوينة) هل فعلاً الدين يسر؟

طبعاً، بالفعل وأكيد وبدون شك أن الدين الإسلامي دين يسر
قال رسول الله صلى الله عليه وسلم: " إن الدين يسر، ولن يشاد الدين أحد إلا غلبه، فسددوا وقاربوا، وأبشروا، واستعينوا بالغدوة والروحة وشيء من الدلجة " [رواه البخاري].
وقال صلى الله عليه وسلم: " يسروا ولا تعسروا، وسكنوا ولا تنفروا " [رواه البخاري].
وعن عائشة رضي الله عنها أنها قالت:
" ما خير رسول الله صلى الله عليه وسلم بين أمرين قط إلا أخذ أيسرهما ما لم يكن إثماً، فإن كان إثماً كان أبعد الناس منه، وما انتقم رسول الله صلى الله عليه وسلم لنفسه في شيء قط إلا أن تنتهك حرمة الله، فينتقم بها لله " [رواه البخاري].
فالدين الإسلامي دين يسر وسماحة، وكل ما جاء فيه من أوامر وتشريع إنما هو لمصلحة الإنسان وصلاحه وتقويم حياته، ومع ذلك فإن الله لم يفرض علينا إلا ما تطيقه نفسنا التي هو أعلم بها، فهو سبحانه أعلم بعباده وما يريد إلا أن ييسر عليهم أمر دينهم:
قال الله تعالى: ( يريد الله بكم اليسر ولا يريد بكم العسر ) [185-البقرة]

طيب، أيه بقى المشكلة؟ بما أننا نتفق جميعاً على أن الدين يسر وليس فيه تشديد على الناس بما لا يطيقون فممكن نخلص كلام على كدة وكله تمام...

بس المشكلة مش في كده، المشكلة الناس إزاي بتفهم يسر الدين؟

قبل ما أتكلم هضرب مثال جاء على بالي لتوضيح الفكرة:
نفرض إن فيه قصر معين عايز تروح عنده بالعربية، وأمامك طرق كتير، وقيل لك أن هذا الطريق المحدد هو الوحيد إللي هيوصلك للقصر، ولكن لازم تلتزم بقواعد المرور الخاصة بهذا الطريق فلا تسير في الإتجاه المعاكس واستخدم الإشارات عند الحاجة... إلى آخره
دخلت الطريق ومن أول كام متر كسرت أشارة مرور، راح موقفك وشدك مخالفة... ممم
وبعدين كملت وشوية ورحت داخل في الحارة المعاكسة عشان تعدي إللي قدامك، راح موقفك وشدك مخالفة... أففف
وبعدين لاقيت الطريق فاضي رحت شادد على السادس وجاوزت السرعة بكتييير، راح موقفك وشدك مخالفة... يوووه
زهقت من كتر المخالفات رحت واخد أول دوران ورجعت ودخلت من طريق تاني، واسع وبحبوح وسهل كدة، مفيش أشارات مرور ولا أي حاجة تمشي تخبط وتبرتع براحتك على الآخر ففضلت ماشي فيه وأنت آخر تمام ومزاجك عنب، بس الكارثة إنك في آخر الطريق... لم تجد القصر !!!

يا ترى فكرة المثال وصلت؟؟

اللهم صلي وسلم على نبينا محمد – صلى الله عليه وسلم-

هذا الطريق هو الدين الإسلامي الصحيح كما وضحه لنا النبي – صلى الله عليه وسلم – والإلتزام به هو السبيل الوحيد لرضا الله سبحانه والفوز بالجنة ( الوصول للقصر)، ولكن هذا الدين الحنيف وضع لنا بعض التشريعات من الأوامر والنواهي وخلافه وأمرنا الالتزام بها ( قواعد المرور ) وهي في الواقع لو تأملتها في حقيقتها لوجدتها لسلامتك والحفاظ عليك وعلى المجتمع ككل، فأوامر الدين وضوابطه لتقويم سلوك المرء ليس لمنعه الخير أو كبته كما يقول البعض.

ولكن نسبة كبيرة من الناس مش عايزة كدة، عايزة تعمل إللي على مزاجها من غير أي قيود، وعشان كدة تلاقيهم إما ماشيين في الطريق الصح بس دائماً ما يقعون في المخالفات وإما يمشوا في غير الطريق الصحيح لأنه أيسر من الطريق الصحيح ( من وجهة نظرهم ) فلا يصلون في النهاية للغاية المنشودة.

نرجع تاني لحديث النبي – صلى الله عليه وسلم – وهو " إن الدين يسر،..." ، ونركز أوي إن النبي – صلى الله عليه وسلم – قال إن الدين يسر، إذن يسر الدين في الدين نفسه وليس في السماح بمخالفة الدين، يسر الدين في الإلتزام بأوامره واجتناب نواهيه، يسر الدين فيما شرعه الله لنا من رخص كثيرة تيسر علينا عند الضيق.

يعني مثلاً قصر الصلاة الرباعية لركعتين عند السفر أليس هذا من اليسر؟ المسح على الخفين في الوضوء أليس من اليسر؟ التيمم للصلاة عند فقد الماء أليس هذا من اليسر؟ تخفيف الصلاة بدلاً من 50 صلاة في اليوم والليلة إلى 5 صلوات فقط ومع ذلك لهم نفس أجر الخمسين.
كما أنه يكفي معرفة يسر هذا الدين ووسطيته لما تشوف الشرائع الأخرى، ويكفي مثال واحد عندما خالف اليهود أوامر ربهم (كالعادة) وعبدوا العجل، فكيف كانت كفارة هذا؟
( وَإِذْ قَالَ مُوسَىَ لِقَوْمِهِ يَاقَوْمِ إِنّكُمْ ظَلَمْتُمْ أَنْفُسَكُمْ بِاتّخَاذِكُمُ الْعِجْلَ فَتُوبُوَاْ إِلَىَ بَارِئِكُمْ فَاقْتُلُوَاْ أَنفُسَكُمْ ذَلِكُمْ خَيْرٌ لّكُمْ عِنْدَ بَارِئِكُمْ فَتَابَ عَلَيْكُمْ إِنّهُ هُوَ التّوّابُ الرّحِيمُ ) [54-البقرة].
كانت توبتهم بأن يقتلوا أنفسهم، كانوا كثيراً ما يشددوا على أنفسهم ويتنطعوا فيشدد الله عليهم.

نرجع تاني ولكن المرة دي لقول السيدة عائشة – رضي الله عنها – " ما خير رسول الله صلى الله عليه وسلم بين أمرين قط إلا أخذ أيسرهما ما لم يكن إثما، ..."، فنلاقي إن اختيار النبي - صلى الله عليه وسلم – للأيسر يترتب على عدم وجود إثم فيه وإلا فإنه - صلى الله عليه وسلم - أبعد خلق الله عن الإثم.

لكن المشكلة ذي ما قلت هي في الفهم المغلوط عند كثير من الناس، يريد مخالفة الدين وفعل المحرمات ويقول الدين يسر.
يعني مثلاً ماتجيش تصلي فرد وتسيب فرد وتقول الدين يسر
ما تفطرش في رمضان من غير عذر وتقول الدين يسر
ما تاخدش رشوة وتقول أصلي محتاج والدين يسر
ما تروحش تتعامل بالربا وتقول الدين يسر
ما تسيبش بنتك ولا مراتك متبرجة وتقول الدين يسر
إلى آخره من المخالفات كبيرة أو صغيرة ومش عايز أفرد تفاصيل فيها لأن كلنا عارفينها كويس.

بيقى لازم نفهم إن الإلتزام بالسنة ليس تزمت ولا تطرف
الحرص على اجتناب ما نهى الله عنه بالدليل الشرعي السليم ليس تشدد

النقطة الثانية: طيب يعني أيه بقى تزمت؟؟

التزمت والتشدد المذموم هو في الأساس من الغلو في الدين، فيحدث هذا من مغالاة الناس في أوامر الدين بدون دليل لا من كتاب ولا سنة ولا قول أحد من السلف، فيحدث هذا التشدد الذي يوقع في تحريم ما أحل الله والتضييق على المسلمين بما لم يشرعه الله ولا يرضى به.
ومن أهم أسباب الوقوع في ذلك هو الجهل وعدم الفهم الصحيح عن الله ورسوله – صلى الله عليه وسلم – والتنطع في الدين بغير علم.

النقطة الثالثة: هل هناك من يتزمت ويتشدد في الدين تشدد مذموم؟

للأسف الشديد يوجد بالفعل من يتشدد ويتزمت بغير دليل ولا حجة ولا برهان، ولا يمكن لأحد أن ينكر وقوع ذلك في مجتمعاتنا، ولكن والحمد لله فئة قليلة نسأل الله أن يفهمنا ديننا الفهم السليم الصحيح ... آآآميين
وذي ما قلت في النقطة إللي قبلها إن ده نوع من أنواع الغلو مع الجهل، وطبعاً الغلو ده في منه درجات، يعني مثلاً من أكبر الأمثلة على هذا الخوارج الذين يكفرون المسلم بارتكاب الصغائر من الذنوب بجهل شديد وبشع، فأصبحوا يكفرون كل من يرتكب أي ذنب مهما صغر، وبقت عادة عندهم مايقدروش يقعدوا من غير ما يكفروا حد، حتى لو مفيش حد ممكن يكفروا نفسهم.
وسمعنا حديثاً عمن يحرم أشياء غريبة كمن يحرم بناء أكثر من طابق في البيوت لأن هذا من التطاول في البنيان! أو يحرم الباذنجان لأنه يزيد القدرة الجنسية!!!
فمثل هؤلاء مازال هناك القليل منهم، كما أنه هناك من يعتقد بفكر الخوارج حتى الآن ولكنهم كما قلت قلة قليلة والحمد لله.

النقطة الرابعة: هل التشدد دائماً بأفعال ليست من الدين أو بالبدع؟

لا، فكما قلت التشدد والتزمت يكون بالمغالاة في الشيء، فأحياناً يكون الشيء من صميم الدين وعليه الدليل والبرهان ولكن الواحد ياخد الموضوع قفش مرة واحدة فيشدد على نفسه في غير مصلحة، وغالباً هو بالتشديد على النفس، وغالباً يكون مع من يلتزم بالدين بعد فترة كبيرة من الفساد وعدم قربه ممن يعلمه عن بداية الالتزام، فتجد منه تشديد على النفس بما لا تطيق من طاعات وسنن هي بالفعل سنن صحيحة وثابتة ولكن تحتاج إلى التدرج فيها، فيصرفه التعمق فيها مرة واحدة عن فعل واجبات وأوامر أو تؤدي به للسقوط مرة أخرى لعدم تحمله ما هو فيه ويظن أن هذا هو الدين فهو لا يقدر على الالتزام به، كالذي يشدد على نفسه في قيام الليل كله من أول يوم ألتزم فيه مما قد يضيع عليه صلاة الفجر ثم بعد ذلك يفتر عن قيام الليل فلا يحصل هذا ولا ذاك.
وطبعاً هذا سلوك غير صحيح فكما ذكرنا حديث النبي – صلى الله عليه وسلم - " إن الدين يسر، ولن يشاد الدين أحد إلا غلبه، فسددوا وقاربوا، وأبشروا، واستعينوا بالغدوة والروحة وشيء من الدلجة "، فيجب على الإنسان أن يتدرج في الدين حتى يقوى فيه ولا يسقط أو ينكسر بسهولة.

النقطة الخامسة: الدين وسط بين طرفين:
طبعاً ما ينفعش أخلص من غير ما أميل تمييلة بسيطة كدة على الناحية التانية وهي التفريط.
كما يقول العلماء الدين وسط بين طرفين، وسط بين التفريط والإفراط
فكما أن هناك إفراط يؤدي للتشديد بدون دليل ولا برهان، فإن هناك تفريط يؤدي للوقوع فيما حرم الله وفي البدع.
فالإفراط والتشديد يؤدي إلى تحريم ما أحل الله، والتفريط يؤدي إلى تحليل ما حرم الله.
فكما أن هناك من يحرم بعض الأشياء دون دليل، فهناك على النقيض من يحلل ما حرم الله ويخالف صريح الأدلة من القرآن والسنة بل ويبتدع في الدين ما ليس منه.
والإسلام لا هذا ولا ذاك، بل الدين وسط بين ذلك، دين وسط لخير أمة أمة الوسطية بين سائر الأمم.

النقطة الأخيرة: خلاصة التدوينة:

1. الدين الإسلامي دين يسر ووسط.
2. يسر الدين في الالتزام بتعاليمه والسير على ما شرعه الله ورسوله – صلى الله عليه وسلم- .
3. الغلو في الدين مرفوض ولا نقول إلا بما جاء به الدليل من كتاب وسنة.
4. الإتيان بالسنة وأوامر الدين ليس تشدد ولا تزمت بل هو أصل الدين وواجب شرعي.
5. التفريط في أوامر الدين مرفوض كما يرفض الإفراط فيها.

أرجو أن أكون قد وفقت في التوينة، وأن يتقبل الله عملي ويعفو عن ما فيه من خطأ وذلل، ويفهمنا الدين السليم بدون إفراط ولا تفريط...


آآآآميييييين




17 نوفمبر، 2009

وليال عشر

السلام عليكم ورحمة الله وبركاته،

فرصة عظيمة ومنحة جميلة يمن الله علينا بها خلال الفترة القادمة، موسم جديد للطاعة وكسب الحسنات.

ساعات ويتم الإعلان عن رؤية هلال شهر ذي الحجة إما يبدأ غداً أو بعد غد، ويبدأ معه هذا الموسم الجميل وهو الأيام العشر الأوائل من شهر ذي الحجة.

وما أعظم هذه الأيام والتي يكفي فضلها وشرفها في أن الله تعالى أقسم بها في كتابه الكريم حيث قال تعالى: " والفجر، وليالٍ عشر "، وجمهور المفسرين على أن المقصود بالليال العشر العشر الأوائل من ذي الحجة، وقد قال الحافظ بن حجر : " والذي يظهر أن السبب في امتياز عشر ذي الحجة لمكان اجتماع أمهات العبادة فيه، وهي الصلاة والصيام والصدقة والحج، ولا يتأتى ذلك في غيره".

وليس هذا فقط فقد قال رسول الله – صلى الله عليه وسلم – ( ما من أيام العمل الصالح فيها أحب إلى الله من هذه الأيام ـ يعني أيام العشر ـ قالوا: يا رسول الله، ولا الجهاد في سبيل الله؟ قال: ولا الجهاد في سبيل الله، إلا رجل خرج بنفسه وماله ثم لم يرجع من ذلك بشيء) [ رواه البخاري].

كما أن بها يوم عرفة والذي هو من أعظم أيام السنة وفيه المغفرة والعتق من النار.

كل هذا في فضل هذه الأيام وحث النبي – صلى الله عليه وسلم – على الإكثار من الطاعات فيها يجعلنا نستعد لها ونفرح بقدومها علينا فهي بالفعل فرصة لكل الناس...

فرصة لمن وجد من نفسه تقصير في شهر رمضان أن يعوض ما فاته ويدرك المغفرة من الله
ولمن خرج من بعد رمضان فسقط في بعض الذنوب فهى فرصة لمعاودة التوبة مرة أخرى
وأيضاً من يعتقد أنه خرج من رمضان على أكمل وجه وأحسن حال ولم يفعل من الذنوب شيء فهي فرصة ليستزيد من الحسنات ويعلو في الدرجات.

فحري بنا أن نشحذ الهمم مرة أخرى لهذا الموسم الجميل وننتهز الفرصة لتغفر لنا ذنوبنا ونحصل على رضا ربنا سبحانه وتعالى.
ولذلك وجب علينا الاستعداد لهذا الموسم ببعض الأِشياء مثل:

1. النية، وهي أول ما نستعد به فننوي ألا نضيع هذه الفرصة وأننا سنجدد فيها العهد مع الله.
2. التوبة، بأن نتوب إلى الله من كل ذنوبنا صغيرها وكبيرها، توبة صادقة لا نهود بعدها أبداً.
3. البعد عن المعاصي، نجتنب كل ما يقربنا من فعل المعاصي والذنوب.

نيجي بعد كده لمجموعة من الطاعات والأعمال الصالحة المستحبة في هذه الأيام وطبعاً هي مش على الوجوب ولكن هو عرض لمجموعة من الأعمال الصالحة المتنوعة التي نذكر بها أنفسنا لنأتي منها ما استطعنا عملاً بحيث النبي – صلى الله عليه وسلم – (ما من أيام العمل الصالح فيها أحب إلى الله من هذه الأيام...) فمن يستطع القيام بها جميعاً فبها ونعمة ومن لا يستطع يكفيه البعض ومن يجد غيرها فكله خير بإذن الله.

1. العمرة والحج: فمن فتح الله عليه ويقدر على الذهاب لأداء فريضة الحج فهى أعظم الطاعات في هذا الوقت، لقول النبي صلى الله عليه وسلم : (العمرة إلى العمرة كفارة لما بينهما، والحج المبرور ليس له جزاء إلا الجنة) [متفق عليه].

2. الصلاة: وهي فرض طبعاً على كل مسلم في كل الأيام ولكن أقصد المواظبة عليها في وقتها وفي جماعة، والإكثار من النوافل وخصوصاً قيام الليل.

3. الصيام: وهو أيضاً من الأعمال العظيمة، ومن لا يستطيع صيام كل الأيام فلا يفوت على نفسه يوم عرفة وهو اليوم التاسع لحديث النبي - صلى الله عليه وسلم - ( صيام يوم عرفة احتسب على الله أن يكفر السنة التي قبله والتي بعده) [رواه مسلم].

4. الذكر: فنكثر من ذكر الله تعالى بالتسبيح والتحميد والتهليل والإستغفار، فعن النبي صلى الله عليه وسلم أنه قال: ( ما من أيام أعظم عند الله ولا أحب إليه العمل فيهن من هذه الأيام العشر، فأكثروا فيهن من التهليل والتكبير والتحميد) [رواه أحمد].

5. القرآن: نكثر من قراءة القرآن والتدبر فيه، ومن يستطع عمل ختمة خلال هذه الأيام فحسن.

6. الصدقة: فنكثر من الصدقات ومساعدة الفقراء والمحتاجين.

وطبعاً ذي ما قلت في أعمال تانية كتيير وكل واحد على قد قدراته.

وربنا يوفق الجميع ويتقبل منا صالح أعمالنا ويتوب علينا ويغفر لنا....
آآآآمين

01 نوفمبر، 2009

هو فيه إيه؟


السلام عليكم ورحمة الله وبركاته،

مش عارف ليه النقاب بقى قضية كبيرة أوي، يعني شيخ الأزهر د/ طنطاوي صرح بعدة أقوال – ورغم إننا معترضين عليها بس لازم ماننساش للشيخ علمه ومكانته إللي بتحتم علينا احترامه – وقام مشايخنا الأفاضل من العلماء المعتبرين بالرد على مسألة النقاب وبيان الحق من كتاب الله وسنة نبيه صلى الله عليه وسلم، وخلصت القضية.

وأنا هنا طبعاً مش عشان اتكلم في حكم النقاب ومناقشة الآراء الفقهية المختلفة ولكن إللي خلاني اكتب التدوينة دي إني لاقيت الموضوع مصممين على تضخيمه.

فبعد شيخ الأزهر قامت وزارة التعليم العالي لتعلن عن منع دخول الطالبات المنتقبات للمدن الجامعية، وبعدها بشوية قرروا منعهم من دخول لجان الإمتحانات بالنقاب، وشعللوا الموضوع تاني...

وبعدين، ولا حتى دي من قبلهم كلهم وزارة الأوقاف التي تتبنى نشر الموضوع وتصر على إقناع الناس كلهم بأن النقاب ليس من الدين في شيء، حتى قرأت أن الوزارة صرفت ملايين من الجنيهات على هذه الحملة والتي شملت طبع كتاب " النقاب عادة وليس عبادة" وعمل ذي حملة كدة تلف على فروع الوزارة لعقد ندوات للعاملات فيها لتقنعهم بخلع النقاب لأنه ليس من الدين – كما يقولون - ...

وأخيراً لسة أمبارح سمعت إن مجمع البحوث الإسلامية في مصر أصدر قراراً يؤيد فيه قرار منع الطالبات المنتقبات من دخول المدن الجامعية والإمتحانات في المعاهد الأزهرية، ولما سأله المذيع أحد أعضاء المجمع عن سبب قيام المجمع بإصدار مثل هذا القرار قال" لأن النقاب ليس من الدين في شيء بل مجرد عادة" وقال " ونحن نريد أن نعلم الناس دينهم الصحيح" وقال أيضاً " أنا أتحدى أي أحد أن يأتي بحديث صحيح يثبت أن النقاب من الدين"...!!!

وذي ما قلت أنا هنا مش عشان أرد على حد ولا أحلل الآراء و أوضح الأدلة على أن النقاب على الأقل من الدين وليس بدعة ولا عادة، ولو كنت عايز تسمع كلام عن الموضوع ده عليك بما قاله بالعلماء:


بس أنا إللي مضايقني إن الموضوع تضخم أوي وشايف فيه شبه عناد..

يعني كام مسئول وكام وزارة وكام مؤسسة كبيرة أصدرت قرارات و تكلمت في الموضوع...

ولو كان فعلاً الدافع – كما يقول عضو المجمع – هو الدفاع عن الدين وحرصهم على تعليم الناس للدين الصحيح،

طب ليه ما شوفناش نص العدد ده من إللي أتكلموا عمل حاجة لما الصحابة – رضي الله عنهم – تم الإعتداء عليهم في بعض الصحف...

ليه محدش منهم اتكلم عما يحدث في الموالد من بدع ودعاء لغير الله بل وذبح لغير الله...

هو عمر ما حد فيهم سمع آلاف من الناس إللي بتبقى في الموالد وهي بتقول " يا سيدي فلان اشفيني " أو أرزقني أو غيره، وعمرهم ما شافوا حد بيدبحلهم...

ليه مفيش حد اتكلم عن لبرتو زفت إللي رايح يجيب مغنية شبه عارية لتقيم حفل فيه...

وهنروح بعيد ليه، سبنا من المستورد وخليك في المحلي، ليه محدش اتكلم عن كباريهات شارع الهرم والعري والفسق والخمور إللي فيها...

ليه وزارة الأوقاف إللي صرفت ملايين عشان تقول للناس إن النقاب ليس من الدين خوفاً عليهم ورغبة في تصحيح دينهم، ليه مصرفتش ربع المبلغ ده في حملة لوقف العري من الشوارع، وليه مفيش كتاب عنوانه مثلاً " التبرج والعري ليس من الدين" ذي ماعملوا كتاب النقاب ليس من الدين...

ليه مفيش حملة وقرارات من بعض الوزارات إللي تكلمت في منع النقاب لمنع التدخين...

يعني مثلاً قرار بمنع التدخين في الجامعات، أه صحيح
أصل أنا رحت الكلية من فترة أخلص بعض أوراق التخرج لقيت في ورقة مكتوب عليها " ممنوع التدخين داخل الكلية، ومن يخالف ستوقع عليه غرامة" وبعدين لقيت واحد واقف جنب الإعلان ده وبيولع سيجارة.

يعني كل إللي فات ده مفيش خوف منه على دين الناس وأخلاقهم

كل ده وغيره مفيش حد عمل معاه حاجة لكن النقاب، أوعى وشك ده أكبر المشاكل

الصراحة حاجة تخنق وتلخبط المخ

الموضوع مش مجرد خايفيين على دين الناس

ولا موضوع النقاب يستغل بصورة سيئة ولا حاجة

إنما فيه حاجة أكبر من كده و غير كده خالص

بس هي أيه بقى... الصراحة مش عارف


28 أكتوبر، 2009

التفاعلات الكيميائية في HYSYS - المثال الثاني

السلام عليكم ورحمة الله وبركاته،

بعد انقطاع لفترة ليست قصيرة عن إضافة الجديد في فيديوهات ال HYSYS، جيت أنهارده بدرس جديد وقيم ( على ما أعتقد ).

الدرس عن التفاعلات الكيميائية مرة أخرى ولكن بمثال جديد ومختلف من حيث التفاعل أو المفاعل المستخدم، وكمان فيه استخدام لل Recycle Operation.

وعشان أنا مبحبش أكتر الكلام في تدوينات ال HYSYS، فنخش في المفيد على طوول وهو لنكات الفيديو، وهو فيديو واحد مقسم إلى 3 أجزاء:


وأتمنى أنه يعجب الناس، ويكون مفهوم

وطبعاً أوعوا حد ينسى يدعيلي...

11 أكتوبر، 2009

لا للإباحية

السلام عليكم ورحمة الله وبركاته،

لا للإباحية

ومش عايزها تبقى مجرد كلمة وشعار بقدر ما يجب أن تكون تطبيق وعمل وسلوك يدفعهم نية صادقة وإرادة قوية.
فعلاً لازم كلنا نقف مع بعض ضد كل أشكال الإباحية، ونقول بعلو الصوت

لا للإباحية
لا للإباحية من خلال المواقع والأفلام الجنسية الفاجرة
لا للإباحية في مجلات العرايا
لا للإباحية في مشاهد الأفلام والمسلسلات وكليبات الأغاني
لا للإباحية من تبرج الفتيات في الشوارع
لا للإباحية في استغلال جسد المرأة في الإعلانات
لا للإباحية في النوادي الليلية وحفلات الرقص المشين
لا للإباحية في تتبع عورات الناس

لا للإباحية في كل صورة من صورها سواء كانت كبيرة أو صغيرة، يعني مش أفلام جنسية وبس، ولكن كل ما يثير الشهوة بشكل غير طبيعي وغير مشروع.

انتشار الإباحية في العالم كله بقى موضوع خطير والكل حاسس بيه، وأنت ماشي في الشارع أو بتتفرج على التلفزيون، أو حتى بتقرأ الأخبار أكيد هتشوف خبر تحرش أو معاكسة أو اغتصاب أو القبض على شبكة آداب أو غيره.

وطبعاً طبعاً الإحصائيات شغالة على ودنه، فتلاقي إننا بقينا من أكتر الناس بحثاً على النت ..... عن مواضيع جنسية ومواقع فاضحة وخلافه.

والموضوع ده مهم جداً ولازم كلنا نقف في وشه، لأن ضرر الإباحية وخطرها مش على الفرد لوحده، ده كمان على المجتمع كله.

فالمجتمع بقى بيعاني منها بشكل خطير من مشاكل وحوادث وتفتت وتمزق أسري والسبب في كثير منها يرجع لكثرة الإباحية.

وانتشار الإباحية له أضرار دينية ونفسية واجتماعية وصحية.

وأول هذه الأضرار على الدين

مفيش حد بينغمس في تيار الإباحية إلا وتلاقي الدين يضعف في قلبه، فهو ينغمس في معصية وشهوة كبيرة تفسد عليه قلبه ويصعب عليه تجديد الإيمان في قلبه، بل يظل ينقص دون زيادة، لحد ما قلبه يبقى مظلم والعياذ بالله.

فتجده حتى وإن كان صالحاً حاله عمال يتدهور، ويفتر بدرجة كبيرة عن الخير وعمل الصالحات، وأصبح عقله وقلبه مشتت.

كما أن الحياء يبدأ في الاختفاء من عنده تدريجياً حتى ينعدم فيصبح معندوش حياء أصلاً، ويبدأ في التجرؤ على فعل المعاصي المختلفة التي يدفعه إليها مجرد شهوة عارمة، بس لما تكون الشهوة دي مثارة بدرجة كبيرة يكون الدافع قوي.

وتلاقيه بدأ في المعاصي مروراً بممارسة العادة السرية والتي تشير الإحصائيات إلى انتشارها بشدة بين الشباب، إلى أن يصل الأمر إلى الزنا – عياذاً بالله- أو الشذوذ أو الاغتصاب.

كما أن كثير من الأزواج من كثرة مشاهدة هذه الأشياء وما بها من شذوذ، يطلبون من زوجاتهم يطيعوهم في فعل ما حرم الله والعياذ بالله.

وبعدين لو شوفنا الجانب النفسي

تلاقيه بقى منعزل نوعاً ما، وتفكيره فيماً حوله قد اختلف
فنظرته لأي امرأة تتحول إلى النظرة الشهوانية أياً كانت هذه المرأة، خصوصاً مع انتشار ما تبثه المواقع الإباحية من أفكار ومشاهد عن زنا المحارم.

كما أنه قد يتأثر بنوعية أخرى وهي التي تبدأ في تحويله إلى شاذ جنسياً.

وتتكون عنده صورة لأي امرأة إنها مثل من يراهم من الداعرات في الأفلام الجنسية، وتصبح المرأة بالنسبة له مجرد شهوة وفقط.

وفي الأضرار الصحية

فإن كثرة الانغماس في هذا يدفعه إلى محاولة تجربة كل ما يراه من أفعال شاذة محرمة ومشينة تجلب الكثير من الأمراض الخطيرة.

وأما الأضرار الاجتماعية

فكل ما سبق من أضرار يصب في المجتمع
فكلنا يعني من انعدام الحياء من الجنسين، فدي بتتبرج وتتعرى دون خجل، وده بيبص ويبحلق ويعاكس ويتطاول دون خجل.

وبعد كدة نشوف حوادث الاغتصاب واللي بتعاني مجتمعاتنا منها بكثرة في الآونة الأخيرة، واللي بتتعدى لاغتصاب الأطفال من الجنسين.

وطبعاً لأن ذي ما قلنا هو معتقد إن كلهم ذي إللي شافهم، وبعدين رؤية الصور والأفلام لم تعد تكفيه، فيبدأ يحاول أن يجسد ما يرى على الواقع، فيصدم بصد المرأة له ونهرها له، فتكون النتيجة إن لا يتوقف، ولكن يزيد الإصرار عنده فيحاول اغتصابها.

كما أن انتشار الأمراض الناتجة عن الممارسات الخاطئة يهدد بخطر اجتماعي أيضاً.

وبنسمع كتير عن حوادث قتل وسرقة كان سببها الأساسي محاولة اغتصاب أو تحرش جنسي أو غيره.

دا طبعاً غير التفكك الأسري وتدمير كيان المجتمع وخراب البيوت وفي الآخر تلاقي السبب أحد أنواع الإباحية.

وكمان هيافة الشباب، طبعاً ماهو الشاب من دول لما بيقى كل همه هيشوف الفيلم ده فين ولا هيدخل على أي موقع أنهارده أو إزاي ممكن يوقع بنت من إياهم، أكيد هتبقى دماغه فاضية أو على الأقل مش شغالة في أي حاجة عدلة.

طيب أيه الحل دلوقتي؟
يعني نعمل أيه؟

كل واحد مننا ممكن يعمل حاجات كتيير:-

1. أولاً ابدأ بنفسك، تحكم في شهوتك، غض بصر، وراقب ربك
ابتعد عن كل حاجة وأي حاجة ممكن توقعك في المشكلة دي، وأوعى تآمن لنفسك، محدش يعرف حاله أيه مع الفتن.
2. لو عندك نت في البيت – وده شبه طبيعي- حاول متبقاش لوحدك في غرفة مغلقة، يعني مبتحبش حد جنبك أو ماتقدرش تخلي حد جنبك على طول، سيب الباب مفتوح وحط الجهاز في مكان واضح لكل إللي معاك.
3. سطب برنامج من برامج منع المواقع الإباحية، وماتقولش ملوش لازمة على الأقل هيكون عائق يخلي العملية مش سهلة، وماتقولش بيقفل مواقع تانية معاه، أنت ممكن تضيف أي موقع على إنه موثوق فيه، أقولك اشترك في خدمة الانترنت الآمن أو انترنت الأسرة –على حسب الشركة المقدمة للخدمة-.
4. لو كنت أب، فهتعمل نفس الكلام إللي فات عشانك وعشان أولادك، ولازم تقعد معهم وتفهمهم خطر الموضوع وسوء عاقبته وأضراره، وماتقولش أنا مش فاضي، دي رعيتك وأنت مسئول عنهم.
5. ومهم جداً جداً إنك تلم مراتك وبناتك، بمعنى إنك متسبهمش متبرجات وفلتين وتقول وأنا مالي.... عيب عليك.
6. والست ذات نفسها لازم تحافظ على نفسها، ومن الأولى أصلاً إنها تحافظ على دينها وتتقي الله في ملابسها.
7. نفس الكلام مع أصحاب السيبرات والنت كافيه، سطب البرنامج ولو حد اشتكي اعرف منه الموقع المقصود ولو كان فعلاً سليم ضيفه في قائمة المواقع الموثوق بيها، وراقب المكان بتاعك كويس لأن أنت برضو مسئول عنه وعن إللي بيحصل فيه.
8. لو أنت صاحب مدونة أو موقع حاول تكتب عن خطر الإباحية وتحذر الناس منه.
9. لو مشترك في منتديات أو الفيس بوك أو تويتر أو ما شابه، ممكن تعمل نفس الحكاية وتكتب عن الأضرار والتحذير منها.
10. لو كنت لبق أو بتعرف تتكلم مع الناس كويس وتقدر توصل المعلومة، استغل أي فرصة تتواجد مع أي حد أو مجموعة من الناس وكلمهم في الموضوع وشجعهم على التحرك ونشر الوعي بين الناس وفي بيوتهم.
11. لو كنت مسئول بقى أو تقدر توصل صوتك لحد مسئول تطلب منه تعميم خدمة الانترنت الآمن وتكون إجبارية، والعمل قدر المستطاع على حجب المواقع الإباحية.

الموضوع كبيير ولازم كلنا نتكاتف فيه وننشر الوعي بين الناس ونحاول على قد ما نقدر نوعيهم ونوضح لهم الخطر الحقيقي في الإباحية حفاظاً على المجتمع والأسرة والفرد وعلى الأخلاق ، وقبل ده كله حفاظاً على الدين والإيمان عند كل الناس.


19 سبتمبر، 2009

العيد فرحة... هييييه


السلام عليكم ورحمة الله وبركاته،

كل سنة وأنتم طيبين، وعيد سعيد إن شاء الله.

ثبتت الرؤية عندنا في مصر بأن غداً 20/9/2009 سيكون أول أيام عيد الفطر المبارك أعاده الله علينا جميعاً بالخير واليمن والبركات.

وبالرغم من الحزن الشديد على فراق الضيف العزيز الغالي شهر رمضان، إلا أن هذا لا يمنعنا من أن نفرح أيضاً بأيام العيد فقد قال النبي – صلى الله عليه وسلم – عن عيد الأضحى " أيام التشريق أيام أكل وشرب وذكر لله".

فكله ياكل ويشرب ويهيص ذي ما هو عايز بس من غير معصية، وده أمر مهم جداً.

ناس كتير، وكتير أوي يعني، بتستقبل العيد بكل أنواع المعاصي المعروفة والغير معروفة، ويتفننوا فيها كمان.

ياريت نتقي الله في أنفسنا، بقالنا 30 يوم – أو 29 بالظبط يعني – في طاعة لله من صيام و صلاة وقيام وتهجد وصدقات وذكر وقراءة قرآن وغيرها من الطاعات العديدة، وكلنا ندعو ونسأل الله أن يتقبل منا، وبعد كده نيجي في أول يوم ونضيع كل إللي عملناه، ده حتى تبقى عيبة أوي.

ياريت بجد نحاول نمسك نفسنا شوية، يعني مش بعد الخمس فروض في الجامع وقيام وتهجد تيجي في أول يوم في العيد وتضيع صلاة فريضة أياً كانت سواء فجر أو غيرها.
نخرج ونفرح ونهيص وناكل كحك وكل حاجة ونفرح ونفرح غيرنا بس من غير ما نغضب ربنا.

يعني الشاب إللي عايز يلفله سيجارة ولا يضرب كباية، بالله عليك بلاش

الشاب إللي رايح من بدري يحجز مكان على الناصية عشان يتفرج براحته، أرجوك بلاش

الشابة إللي كانت محجبة ومحتشمة في رمضان، مش هتخسري حاجة لو فضلتي كدة، أرجوكي خليكي محترمة، الجو ماهواش حر أوي يعني، ولو حر مش هيبقى أحر من النار والعياذ بالله

الشباب إللي هيقضوا أول ليالي العيد في حفل غنائي راقص ماتع وائع لاسع...، اتقوا الله في أنفسكم

فرب رمضان هو رب طول العام.

في حاجة تانية، على الوجه الآخر نلاقي ناس بتقضي أول يوم في التُرب – المقابر يعني – يقولك نروح نزورهم ونعيد عليهم! وطبعاً حدث ولا حرج عما يحدث هناك من بكاء وغيره وخصوصاً من النساء، يعني خلاص داقت بكم الدنيا جايين يوم الفرح والسعادة تعيطوا، ده طبعاً ليس من هدي النبي - صلى الله عليه وسلم – ومنهي عنه فأيام العيد للفرح والسعادة.

حاجة كمان وهي حديث منتشر عن قيام ليلة العيد وأن من قامها لم يمت قلبه يوم تموت القلوب، الأحاديث الواردة في هذا ما بين الضعيف جداً والموضوع على حسب ما ورد في تخريج الشيخ الألباني لهم، فلم يثبت ذلك عن النبي - صلى الله عليه وسلم -.

يجي بقى الدور على آداب يوم العيد وتتمثل في:

1. الاغتسال والتطيب ولبس الجميل من الثياب لقوا أنس – رضي الله عنه -: " أمرنا رسول الله - صلى الله عليه وسلم – في العيدين أن نلبس أجود ما نجد، وأن نتطيب بأجود ما نجد، وأن نضجي بأثمن ما نجد".
2. الأكل قبل الخروج لصلاة العيد، وذلك في عيد الفطر أما في عيد الأضحى فينتظر حتى يعود ويذبح ويأكل من ذبيحته.
3. التكبير، وهو يبدأ من ليلة العيد، وينتهي في عيد الفطر عند خروج الإمام للخطبة وفي عيد الأضحى يستمر إلى آخر أيام التشريق.
وهو يفضل عند الذهاب للمصلى، وبعد الصلوات المفروضة – في حالة عيد الأضحى-.
واصح ما ثبت في تكبيرة العيد " الله أكبر الله أكبر الله أكبر لا إله إلا الله، الله أكبر الله أكبر ولله الحمد".
4. الخروج لصلاة العيد من طريق والعودة من طريق آخر، فعن جابر: " كان النبي - صلى الله عليه وسلم – إذا كان يوم عيد خالف الطريق".
5. تهنئة من تقابله من المسلمين بهذا اليوم، وتهنئة الأقارب أيضاً من باب صلة الرحم.
6. عدم الحرج في التوسع في الأكل والشرب واللهو المباح.

وهناك أيضاً إخراج الزكاة ويكون وقتها قبل الصلاة.

دي كانت تدوينة كدة على الماشي منها تهنئة بالعيد ومنها التذكرة ببعض آداب العيد وأيضاً التحذير من بعض الأخطاء.

ياريت براحة شوية على الكحك واللذي منه

كل سنة وأنتم طيبين.


22 أغسطس، 2009

رمضان كريم

السلام عليكم ورحمة الله وبركاته
كل عام وأنتم بخير
و رمضان كريم

إنقطاع مؤقت حتى نهاية شهر رمضان وإن شاء الله نعود بعد العيد
ولغاية ما ارجع اسيبكم مع أحلى كلام

كلام الله


19 أغسطس، 2009

أدعية ووصايا رمضانية


السلام عليكم ورحمة الله وبركاته،

عن أبي هريرة –رضي الله عنه- قال رسول الله –صلى الله عليه وسلم- : " ثلاث دعوات مستجابات: دعوة الصائم ودعوة المظلوم ودعوة المسافر".

وطبعاً كلنا عارفين إن رمضان خلاص، كلها يومين ويهل علينا، يعني 30 يوم صيام، لو كل واحد حدد لنفسه دعوة أو أكثر يكثر من طلبها من الله كل يوم، إن شاء الله ربنا يستجيب كما وعدنا رسول الله –صلى الله عليه وسلم- أن دعوة الصائم مستجابة.

و أكثر وقت يتحقق فيه هذا هو عند الإفطار، فعن أبي هريرة –رضي الله عنه- عن النبي –صلى الله عليه وسلم- قال: " ثلاث لا ترد دعوتهم: الصائم حين يفطر، والإمام العادل، ودعوة المظلوم "، وعن عبد الله بن عمرو بن العاص –رضي الله عنهما- قال رسول الله –صلى الله عليه وسلم- : " إن للصائم عند فطره لدعوة ما ترد".

يبقى كل واحد يجهز نفسه ويرتب ما يريد أن يطلبه من الله، ويستعد قبل أن يفطر بفترة ويختلي بنفسه ويسأل الله بتضرع وحضور قلب ما يريده والله سميع مجيب.

غير كدة في مجموعة من الأدعية والأذكار المأثورة عن النبي –صلى الله عليه وسلم- مختصة برمضان منها مثلاً:

إذا رأى الهلال يستقبل القبلة ويقول: "الله أكبر، اللهم أهِلّه علينا بالأمن والإيمان، والسلامة والإسلام، والتوفيق لما تحب وترضى، ربنا وربك الله".

وعند فطره : " ذهب الظمأ، وابتلت العروق، وثبت الأجر والثواب إن شاء الله".
وأيضاً " اللهم لك صمت، وعلى رزقك أفطرت".

ولا ينسى كما قلنا الدعاء بما يريد، وإنما الدعاء السابق للعمل بسنة النبي –صلى الله عليه وسلم- وأيضاً فكلامه –صلى الله عليه وسلم- جامع لخير كثير.

في العشر الأواخر عند تحري ليلة القدر يقول : " اللهم إنك عفو تحب العفو، فاعف عني".

وأيضاً في ليلة القدر يكثر من الدعاء لعل الله يستجيب إن شاء الله.

وفي بقة الأدعية بتاعت كل يوم ذي أذكار الصباح والمساء، وأذكار النوم والاستيقاظ منه، وإلى آخرها من الأدعية والأذكار وانصح كل واحد يواظب عليهم ويكثر منهم ومن غيرهم.

وصية تانية وهي جلسة الشروق، بعد الفجر تقعد في المسجد –بقدر الإمكان- تذكر الله وتقرأ القرآن لغاية الشمس ما تطلع، وبعدين تصلى ركعتين، وإن شاء الله تفوز بأجر الحجة والعمرة التامة.

وصية كمان، حاول على قد ما تقدر تكثر من الاستغفار والتسبيح والتحميد والتهليل والصلاة على النبي – صلى الله عليه وسلم-.
وكما حاول تكثر من الصدقات والاعمال الصالحة عموماً.

صلاة التراويح والتهجد، ماتفرطش في ثواب قيام ولو ليلة في رمضان وخصوصاً العشرة الأواخر.

قوم اتسحر كل يوم ولو على تمرة أو علبة زبادي أو بق مية عشان تحصل على بركة الصيام.

أنوي الصيام وصحح نيتك فيه وفي كل أعمالك الباقية.

وأخيراً:
أوعى تنساني في دعائك قبل الفطر وعند القيام وفي أي وقت أنت عايزه.

17 أغسطس، 2009

يا باغي الشر اقصر


السلام عليكم ورحمة الله وبركاته

عن أبي هريرة رضي الله عنه قال: قال رسول الله –صلى الله عليه وسلم- " إذا كان أول ليلة من شهر رمضان، صُفدت الشياطين ومردة الجن، وغُلقت أبواب النار فلم يفتح منها باب، وفُتحت أبواب الجنة فلم يغلق منها باب، وينادي منادٍ: يا باغي الخير أقبل، ويا باغي الشر أقصر، ولله عتقاء من النار، وذلك كل ليلة " ]رواه الترمذي[

خلاص يا جماعة، رمضان على الأبواب، وكله لازم يكون استعد له، وإللي لسه يقوم بسرعة ويلحق نفسه.

ومع كل الخير والفضل الكبير في هذا الشهر الكريم، بس برضوا في نوعية من الناس مش عايزة تسيبنا في حالنا، مش عاجبهم إن سوقهم يقف في رمضان والحالة تبقى نايمة.

ناس شايفة إن رمضان شهر "ثقيل" ومابيعديش بسرعة، وبيتعبوا فيه ومش قادرين يعملوا كل حاجة –دا إذا كانوا من الناس إللي بتصوم وفعلاً بتمتنع عن بعض الحرام وإلا ففي ناس مش فارقة معاها رمضان من غيره لا بيصوموا ولا بيصلوا ولا.... وربنا يهدي-.

الفئة دي من الناس ربنا حذرنا منها عموماً فقال: " وَلَا تُطِعْ مَنْ أَغْفَلْنَا قَلْبَهُ عَنْ ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا " ]الكهف 28[

فمن باب أولى نحذرهم في هذا الشهر الكريم ونجتنب شرورهم، نبعد عنهم ونتركهم وما يفسدون.

يعني بدل ما يستغلوا هذا الشهر في بث ما يصلح الناس ويخليهم اقرب إلى ربهم ويساعدهم على الانتفاع بموسم الطاعة ده، تلقيهم عاملين خطة محكمة لتدمير قلوب وعقول الصائمين ويقولك " رمضان بيقربنا " ... طب ياترى هنقرب من مين وعشان أيه وفي مقابل إيه؟!!

لما يكون يوم الصائم وليله كله قاعد قدام التليفزيون من المسلسل ده لده، ومن البرنامج ده لده، وعييييش يا معلم وسلي صيامك، ضيع الوقت واشغل نفسك عشان ماتحسش بالصيام....

لا إله إلا الله، للدرجة دي رمضان تقيل على قلوبهم وعايزين يضيعوا الوقت في أي حاجة، وياريتها أي حاجة، دي معاصي وذنوب ورنا يستر.

قال رسول الله –صلى الله عليه وسلم- " من لم يدع قول الزور والعمل به فليس لله حاجة في أن يدع طعامه وشرابه "

يعني الصيام مش صيام أكل وشرب وبس، ده صيام عن كل ما يغضب الله، صيام عن المعاصي والذنوب وكل قبيح.

يعني الست إللي مصرة تخرج متبرجة ومتعطرة، وتمشي تفتن إللي رايح وإللي جاي نقولها " يا باغي الشر اقصر"

الناس إللي قاعدة في وسط الشارع وبتجهر بالفطر في نهار رمضان نقولهم " يا باغي الشر اقصر"

يعني الناس إللي بتحب تسلي صيامها بالخوض في أعراض الناس وغيبتهم نقولهم " يا باغي الشر اقصر"

أصحاب الخيبة الرمضانية والسهر في معصية الله نقولهم " يا باغي الشر اقصر"

أصحاب القنوات الفضائية المُصرين على بث ما يغضب الله وفتن الناس نقولهم " يا باغي الشر اقصر"

قال تعالى " وَاللَّهُ يُرِيدُ أَنْ يَتُوبَ عَلَيْكُمْ وَيُرِيدُ الَّذِينَ يَتَّبِعُونَ الشَّهَوَاتِ أَنْ تَمِيلُوا مَيْلًا عَظِيمًا (27) يُرِيدُ اللَّهُ أَنْ يُخَفِّفَ عَنْكُمْ وَخُلِقَ الْإِنْسَانُ ضَعِيفًا (28) " ] النساء 27-28[

10 أغسطس، 2009

عيب عليكي يا جامعتنا

السلام عليكم ورحمة الله وبركاته،

الحمد لله اتخرجنا من الكلية على خير، وظهرت النتيجة من فترة وعدت على خير برضو
ومن الطبيعي جداً إننا نحصل على شهادة تخرج مؤقتة تستخرج عشان نخلص بيها مصالحنا.
وكان الطبيعي برضوا إن الشهادات تطلع مع النتيجة أو بعدها على طول، وفعلاً تم إقناعنا بأن الشهادات هتطلع يوم ظهور النتيجة
ولكن كالعادة دة محصلش وتأخرت حوالي 10 أيام، وإللي وراه جيش يولع، وإللي عايز يقدم شغل يتحرق وعادي جداً
وكأن الناس مش عارفة إن معاد الجيش ثابت كل سنة هو هو وبرضوا مفيش فايدة

عموماً مش ده المهم، المهم إننا لما سألنا عن سبب تأخر الشهادات كان الرد مفاجئة
" الجامعة بتعمل شكل جديد للشهادات ومستنيين يبعتولنا " ....!!!

حسيت إني واقف في عالم سمسم

يعني حضرت جناب المسئول المحترم المبجل مكانش عارف إن النتيجة هتطلع
ولا هو صحى من النوم فجأة لقى النتيجة اتعلقت؟؟
وبعدين لما هم عايزيين يغيروا شكل الشهادة كانوا فين من أول السنة، يا عم بلاش، فين من أول الامتحانات؟؟
لكن هو كدة، الموضوع بدون مقدمات النتيجة طلعت فشافوا إن شكل الشهادة مش ولا بد فقالوال نغيره، يعني إحنا ورانا إيه يعني.....

بجد مش عارف اقول ايه، ياترى دي فعلاً جامعة ولا إيه الحكاية.

بعد كدة وصلت بحمد الله الشهادات الجديدة للكلية، والكل عرف وراح يجيب الشهادات
ومن الطبيعي كل سنة إنه يتم استخراج 3 شهادات لزوم الجيش والنقابة والشغل والشغل والشغل و....
ولكن كانت المفاجئة...

" مفيش غير شهادة واحدة بس لكل طالب... وبالعربي بس و مفيش بالانجليزي...."

طبعاً حاجة غريبة ولما سألنا كانت الاجابة برضوا مفاجئة

" الجامعة بعتت عدد محدود من الشهادات على قد عدد الطلبة بحيث كل واحد له شهادة واحدة بس"..!!!!!!!!

طبعأ رد غريب جداً ومستفز جداً
يعني إيه مفيش عدد كفاية
هي المطبعة قفلة مثلاً
ولا مفيش ميزانية ومستنيين أول الشهر
ولا بيفكروا يغيروا الشكل تاني
ولا إيه بالضبط

طيب هناخد باقي الشهادات امتى؟؟
" معرفش" أو " كمان شهر"

بجد لو كانوا مردوش عليا كان يبقى احسن

أومال لو كانت الشهادة ببلاش كانوا عملوا إيه؟
آه ماهي الشهادة ب 30 جنيه ونص، عادي أصل التعليم مجاني من زمان
ووالله لو كانت اغلى وطلعوا العدد إللي إحنا عايزينوا كانت الناس هتدفع عادي
بس إللي حصل ده الصراحة عيييب أوي

يعني إللي عنده جيش راح قدم الشهادة إللي حلته ويستنى الفرج بقى...

بجد عيب إللي حصل، والاكتر منه الرد الغريب على الاسئلة

كان نفسي في آخر حاجة ليا في الكلية تسيب ذكرى حلوة بس للأسف
مفيش فايدة

07 أغسطس، 2009

غفر له ما تقدم من ذنبه...

السلام عليكم ورحمة الله وبركاته،

قال رسول الله صلى الله عليه وسلم :
" من صام رمضان إيماناً واحتساباً غفر له ما تقدم من ذنبه " متفق عليه

وقال صلى الله عليه وسلم:
" من قام رمضان إيماناً واحتساباً غفر له ما تقدم من ذنبه " متفق عليه

وقال أيضاً صلى الله عليه وسلم:
" من قام ليلة القدر إيماناً واحتساباً غفر له ما تقدم من ذنبه " متفق عليه

فعلاً فرصة عظيمة جداً، لا تتكرر إلا مرة كل سنة
تخيل أنك ولمدة شهر كامل لديك الفرصة ليغفر لك جميع ذنوبك الماضية، كل يوم تتجدد هذه الفرصة ويفتح أمامك باب الفوز بالمغفرة من الله.
كل اللي عليك تعمله انك تصوم رمضان، بس تصومه بجد وبنية خالصة لوجه الله، وده هو الإيمان والاحتساب، تؤمن بالله وبوجوب تنفيذ أمره في الصيام، وتؤمن بصدق وعده لك في غفران الذنوب، وتحتسب صيامك هذا في سبيل الله وما تتحمله من مشقة الصيام لكي تجده بإذن الله في صحيفة أعمالك.

مش بس كدة، دا كمان الفرصة تتضاعف وذلك بقيامك للشهر برضو إيماناً واحتساباً، فتتخير المسجد الجيد وراء إمام يساعدك على الخشوع، تصلى ورائه حتى ينصرف فتفوز بأجر قيام الليل كله، تحتسب عملك هذا في سبيل الله وفي طلب رضائه، تجد انك تحصل على فرصة أخرى لمغفرة الذنوب.

ويأتي بعد ذلك العشر الأواخر، وما أحلاها من أيام وليالي، تتحسس فيها ليلة القدر لتفوز بأعظم الهبات والفضائل، وتلتمسها بالقيام والتهجد لتحصل على الفرصة الثالثة لمضاعفة فرصتك في مغفرة الذنوب، فتلاقي نفسك في جو إيماني كبير ورائع وعظيم جداً.
يا ترى بعد الفرص الكتيرة دي ممكن تطلع من رمضان وانت لسة ذنوبك لم تغفر؟!
ياترى عندك ذنوب قد إيه؟!
اختار اي شهر يعجبك واحسب لنفسك فيه عدد الذنوب إللي عملتها... قد إيه؟
طيب على مدار 11 شهر يبقوا كام ذنب...؟
يا ترى لسة مستعد تضيع فرصتك في النجاة وتخلى ذنوبك تتراكم عليك إلى العام القادم؟!
ياترى أنت اصلاً ممكن تعيش لحد العام القادم؟!
ياترى أنت ممكن تدرك شهر رمضان من اساسه؟!
اعتقد مفيش حد ممكن يضمن عمره، ومفيش حد عايز ذنوبه تفضل على كتافه.
إلحق من دلوقتي جدد النية في استقبلك لرمضان واستعد للفوز بمغفرة الذنوب.

اللهم بلغنا رمضان
واعتق رقابنا من النار
واغفر لنا الذنوب والآثام


30 يوليو، 2009

وتوبوا إِلَى اللَّه جميعا أيها المؤمنون

السلام عليكم ورحمة الله وبركاته،

يقول الله تعالى:
{ وَتُوبُوا إِلَى اللَّهِ جَمِيعاً أَيُّهَا الْمُؤْمِنُونَ لَعَلَّكُمْ تُفْلِحُونَ} النور31


وهاهو شهر شعبان أوشك على الإنتصاف، واقترب منا شهر رمضان، شهر المغفرة والرحمة والعتق من النار، شهر مبارك بكل معاني الكلمة، تتضافع فيه الحسنات وتزداد فيه القربات لما ييسره الله لنا من سبل الخير والطاعة في هذا الشهر الكريم.


كل واحد فينا عنده الكثير من الذنوب لا يعلمها إلا الله، نذكر بعضها وننسى البعض الآخر لكن الله يعلم كل شيء ولا ينسى شيء ابداً سبحانه (يوْمَ يَبْعَثُهُمُ اللَّهُ جَمِيعًا فَيُنَبِّئُهُم بِمَا عَمِلُوا أَحْصَاهُ اللَّهُ وَنَسُوهُ وَاللَّهُ عَلَى كُلِّ شَيْءٍ شَهِيدٌ).


فعلى ما اعتقد إن أول حاجة الواحد يفكر يعملها لإستقبال هذا الشهر الكريم هي إعلان التوبة من جميع الذنوب والمعاصي


اللهم تب علينا واغفر لنا ذنوبنا ما تقدم منها وما تأخر

لإن التوبة تجدد الإيمان في قلب العبد فينشط في العبادات ويسعد بأدائها، فيساعده ذلك على استقبال رمضان بكل شوق وحب، كما يجعل الله يفتح عليه من الخير الكثير ليحصل به الحسنات في هذا الشهر الكريم.


أبدا توبتك بالاعتراف بما ارتكبت من ذنوب، كلنا يذنب، وخير الخطائين التوابون، اعترف بانك اذنبت، واستغفر الله على هذا الذنب


اطلب منه المغفرة على هذا وعلى كل ما صدر منك.


لقد آن الاوان لنتوب

لقد آن الاوان لنعود إلى الله
آن الاوان لنترك المعاصي والذنوب والشهوات

آن الاوان لترك الاغاني والكليبات، ترك التدخين، ترك النساء للتبرج، وترك الرجال للنظر لمن تتبرج، ترك وترك وترك....
وكل واحد يعلم مايفعله ويجب عليه تركه.

مقبل علينا شهر كريم، فيه الخيرات كثيرة، ولكن الخوف من استمرار الذنوب والعصيان في هذا الشهر الكريم

فكما تتضاعف فيه الحسنات تتضاعف فيه السئات أيضاً

فيا ألف حسرة على من ضيع الشهر في اكتساب ذنوب متتضاعفة فوق ذنوبه


لذلك فإن الدعوة للتوبة قبل رمضان هي بمثابة التحصين من الوقوع في الذنوب

اعطي نفسك الفرصة لتصلح حالها مع ربها، وتقبل عليه بالشوق واللهفة


اللهم تب علينا
اللهم تب علينا
اللهم تب علينا

25 يوليو، 2009

كفاية فشخرة


السلام عليكم ورحمة الله وبركاته،
ظاهرة منتشرة جداً في مجتمعنا، مش بس بين الشباب ولكن بين الكبار أيضاً...
الفشخرة
ولو الكلمة غريبة عليك ممكن تقول عليها المنظرة الزائدة عن الحد أو التباهي الزائد عن الحد أوي أو الإسراف المبالغ فيه.
فعلاً الناس بقى عندها منظرة وفشخرة كدابة ذي ما الناس بتقول، ومع استمرار التقدم التكنولوجي زادت الفشخرة أوي..
يعني لو اخدنا الموبايل كمثال هتلاقي إن كل البشر عندنا بقى معاهم موبايل، سواء له لازمة أو لأ، لحد كدة ممكن تتبلع ونقول انه هيستخدمه كدة كدة في وقت من الاوقات، لكن ليه الناس تصر على شراء أحدث الاجهزة باحدث الامكانيات؟؟
ليه الشاب من دول لازم يكون الموبايل كاميرا آخر حاجة والذاكرة كبيييييييييييييرة وكل الإمكانيات فيه وتليفزيون وكمان له كاميراتان، إلا صحيح هو في حد من إللي عندهم كاميراتان استخدمهم فعلاً للغرض المصنوعة له؟!
لو سألت الواحد من دول عايز كاميراتين ليه هيقولك عشان اعرف اصور نفسي!!!!!!!
دي حقيقة لأن الكاميرا الامامية إنما كانت فكرتها لسهولة إجراء اتصال مصور فيديو (video call)، لكن يا ترى كام واحد عنده الخاصية دي اتكلم فيديو كوول؟
الموبايل هيجنن الناس والصين الحبيبة عرفت دماغ شبابنا عايزة ايه وريحته على الآخر..
الواد من دول عايز يمشي يسمع الناس كلها صوت موبايله – فشخرة يعني- طيب يا سيدي حطله خمس سماعات فالتليفون واعمله تليفزيون فيه كمان.
الواد عايز يتفشخر ذي رجال الاعمال، أوك اعمله الموبايل تتش سكريين وبقلم وحوارات من دي، وهكذا
يعني ممكن الواحد من دول يكون على قد حاله مش غني أوي يعني ومع ذلك ياخد تحويشة كذا شهر ويروح يحطها في موبايل بكذا ألف وتلات تربع امكانياته هو لن يستخدمها ولن تفيده بس هي الفشخرة.
حتى لو كان الواحد معاه فلوس كتيير ومستريح، برضوا لازم يكون عاقل ويصرف الفلوس في مكانها حتى لا يكون من المسرفين.
الناس إللي برة رغم إن هم الذين ابتكروا كل هذه الاختراعات والتكنولوجيا لكن تلاقي كتيير منهم لسة شايل الموبايل أبو اريال، ليه ؟ يقولك أصل أنا مش محتاج حاجة تانية منه!
مثال تاني وهو الملابس... هدومك منين يا معلم،
طبعاً توكيل يا ماااان... اشطة
تلاقي برضو الواحد من دول يفضل يحوش وفالآخر يروح يشتري كوتشي بـ 800 جنيه، طيب أنا هسأله هو الكوتشي ده فيه إيه يستاهل انه يكون بالثمن ده؟
بالإضافة إلى إنه توكيل هيقولك إنه حاجة نضيفة وبتعييش، طيب يا سيدي خليك معايا واحدة واحدة...
الكوتشي أبو 800 الخامات بتاعته والتشغيل والفنش يفرق إيه عن أبو 200 ولا 300؟ ما هو أنا مش هقارن الكوتشي التوكيل بواحد ب 50 جنيه لأن فيه فعلاً فرق لكن الكوتشي مثلاً أبو 200 يفرق إيه عن التوكيل أبو 800؟؟ أنا أكاد أجزم أن الفرق لن يتعدى 100 أو 150 جنيه، يا عم قول 200 جنيه، يعني الكوتشي يصبح ثمنه 400 جنيه، طب والباقي ده بتاع إيه؟؟؟؟
ده يامعلم ثمن التوكيل!!!
أيوه ثمن الماركة إللي محطوطة على الكوتشي ولًا التي شيرت لأن الشركة بتبيع الماركة قبل المنتج فهمت اللوزة.
يعني الكوتشي الـ PUMA غير adidas غير Nike وهكذ، تلاقي نفس النوع بس السعر مختلف لأن الماركة مختلفة وسعرها كمان.
صدقني هي دي الحقيقة، ما تفتكرش إن الحاجة التوكيل دي بتتصنع فالقصر الملكي مثلاً مصنع ذي غيره بس الماركة هي الفرق.
أخر حاجة اتكلم فيها إن ناس كتير شايفة إن إللي معاه فلوس ومايشتريش الحاجات الغالية كلها يبقى بخييل..
هو فعلاً فيه ناس بتبقى بخيلة وبخيلة قوي بس برضو فيه ناس ذي ما قولنا بتبقى فاهمة هي عايزة ايه وتحط فلوسها في ايه سواء كانت الحاجة غالية أو لأ المهم أكون فعلاً محتاجها ومخليش في نفسي حاجة.
اظن الكلام ده مايزعلش حد ولازم كل واحد يشوف هو بيصرف فلوسه في إيه ويفتكر إنه هيتسئل عن ماله فيما انفقه.
كفاية كدة
وسلام

20 يوليو، 2009

التفاعلات الكيميائية في HYSYS

السلام عليكم ورحمة الله وبركاته،
بقالي كتيير معملتش حاجة جديدة، معلش
انهارده بدأت في جزء جديد في برنامج HYSYS وهو التفاعلات الكيميائية، والبداية بمثال بسيط لتفتيح المواضيع وبعد كدة نشد على الخامس.
طبعاً من غير كلام كتير وذي كل مرة الشرح من خلال فيديوهات، وهو الصراحة فيديو واحد مرفوع على جزئين مضغوطين.
لتحميل الفيديو الروابط اهية



طبعاً كالعادة نزل الجزئين وفك الضغط وعييش.

ياريت بجد بجد تدعولي لإني محتاج الدعاء أوي هذه الايام.

يلّا بقى سلااام.

11 يوليو، 2009

حجاب آخر جنان

السلام عليكم ورحمة الله وبركاته،
تدوينة انهاردة طلعت في دماغي فجأة بدون ترتيب على غير العادة.
سبب ذلك إني - وللأسف- شاهدت أمس جزء من برنامج على إحدى الفضائيات، البرنامج تقدمه مذيعة المفروض إنها محجبة وملتزمة -ذي ما بيقولوا- ودول كتروا الأيام دي على الفضائيات في برامج حوارية مختلفة.

الموضوع اللذيذ إللي شاهدته كان عبارة عن أزياء لـ " ست الحسن" المتحجبة، فقد استضافت المذيعة احد مصممي الازياء لأستعراض عدة موديلات للمحجبات...

وكانت البداية بالنسبة لي مع إتصال هاتفي من إحدى الفتايات تقول لهم إنه لا يصح ان تكون ملابس المحجبات بها الكثير من الاكسيسوارات والالوان المبهرجة حتى لا تلفت الانظار، فوجدت رد فعل شديد جداً من المذيعة والضيف على المتصلة وان هذا لا مانع فيه وأهم حاجة إن اللبس لا يصف!!!
المهم إن بعدها على طول جابوا صورة فستان من بتوع المصمم ده .... بمجرد ما شوفت الفستان حسيت على طول انهم مصابين بإحدي الاشياء الثلاثة دي:
1. جهل مركب بمعاني اللغة العربية فلا يعرفون معنى انه لا يصف
2. حول في العين أو عمى كلي
3. بلاهة في إدراك الاشياء
وفي أي حالة من دول مقدرش اقول حاجة غير الـ"دعاء" لهم بالشفاء والهداية.

أنا حسيت كدة ليه، لأن الفستان مفيش حاجة إلا ووصفها، من ذراعين وصدر ووسط، وطبعاً الطرحة شبه عمة العمدة يادوب مغطية الشعر من غير الرقبة
.وبعدين قلت في نفسي : طيب ده لو مش عارفين معنى أنه لا يصف، بس هما برضو مش عارفين باقي مواصفات الحجاب الشرعي، ممكن ننتهز الفرصة ونقولها بالمرة:
1- أن يكون ساتراً لجميع العورة، وهي الجسد كله دون الوجه والكفين إتفاقاً، والوجه والكفين فيهما خلاف بين العلماء بين الوجوب والاستحباب:
ومعنى كدة إن كله يستر (معادا الوجه والكفيين زي ماقلنا)... كله، يعني مينفعش عباية كمها واسع يبين الذراعين، ومينفعش القصة تبان من الشعر، ولا طرحة سبانش والرقبة تظهر، ولا الودان ولا أي حاجة، ولا أي حاجة، وش وكفيين وبس.

2- ألا يكون زينة في نفسه، أو مبهرجا ذا ألوان جذابة تلفت الأنظار.
3- أن يكون سميكا لا يشف ما تحته من الجسم:
يعني برضو مينفعش كم البلوزة يكون شيفون، ولا حتى جزء منه، لا يصف أي شيء مما هو واجب تغطيته.

4- أن يكون فضفاضا غير ضيق ولا يجسم العورة ولا يظهر أماكن الفتنة في الجسم:
 يعني لا يصف، لا يصف أي شيء في جسم المرأة، لا يصف حجم أي جزء منها، يعني مش أماكن وأماكن، لا كله، لايصف حجم الذراعين ولا الرجلين فضلاً بقى عن حجم الصدر أو البطن أو غيرهما.

5- ألا يكون الثوب معطراً.
6-ألا يكون الثوب فيه تشبه بالرجال.
7- ألا تشبه زي الراهبات من أهل الكتاب ، أو زي الكافرات.
8- ألا يكون ثوب شهرة، و ثوب الشهرة هو الثوب الذي يقصد بلبسه الاشتهار بين الناس كالثوب النفيس الثمين الذي يلبسه صاحبه تفاخرا بالدنيا و زينتها.

هي دي شروط الحجاب كما امر الله ورسوله - صلى الله عليه وسلم- ومن يريد الاطلاع على الادلة يراجع احد كتب الفقه.

طيب إيه بعد كدة، قعدت تقول إن المتحجبة لازم تلبس آخر موضة وتحط المكياج عشان الناس تشوفها وتعرف إن الحجاب مفهوش تكتيف ولا تقييد ولا ولا ولا وكلام كتير كده ملوش لازمة .

يا جماعة فعلاً تعبنا من كتر الكلام ده، الناس إللى مش عارفة حاجة عن الدين ولا الإلتزام بأوامر الله مفكرة إن العملية عقد وكلاكيع وكله حرام في حرام فمايصدقوا يلاقوا حد ذي دول يفسرلهم الدين على مزاجهم ويتشعبطوا فيه، ذي ما واحدة كلمت المذيعة وقالت لها " أنا كنت غير محجبة لاني كنت شايفة الحجاب تقييد وتكتيف، بس بعد ما شوفتك عرفت إن الحجاب سهل وبسيط، وأنا لبست الحجاب عشان خاطرك انت!!"

أنا الصراحة مش عايز اتكلم اكتر من كدة، بس هاعمل إيه، كان لازم اكتب ده، والأهم إني كان لازم اعرف من زمان إن واحدة لابسة الحجاب الروش ده وحاطة مكياج كامل وعملة اللالّي ماكانتش هتقول غير كدة.

حسبي الله ونعم الوكيل
حسبي الله ونعم الوكيل
حسبي الله ونعم الوكيل

09 يوليو، 2009

هام لمهندسي التكرير والهندسة الكيميائية

السلام عليكم ورحمة الله وبركاته،
بما إن أنا قلت إني عملت المدونة دي عشان أفيد بما اعلم، فأنا عايز اعلن عن دورات للمهندسين على النت.
محدش يقول ده إعلان للمنتدي ولا حاجة لأن الهدف الاساسي من هذه التدوينة هو فعلاً توصيل الفائدة للجميع.
الدورات هتبقى على منتدي البترول العربي وهما دورتين:

دورة البرمجة هيشرحها المهندس أيمن رسلان بكالورويس هندسة تكرير وبتروكيمياء
ودورة ال HYSYS هيشرحها المهندس أحمد مختار (إللي هو أنا) برضو بكالورويس هندسة تكرير وبتروكيمياء.

دورة البرمجة محدودة بعدد 50 مشترك يعني تلحق تشترك قبل غيرك.
عشان التفاصيل خش على لينكات المواضيع بالضغط على اسمها فوق.

بالنسبة لل HYSYS سيتم استمرار رفع الفيديوهات على المدونة ولكن الدورة سيكون بها تفاصيل أكثر مكتوبة وليس فيديو.

كدة كفاية وسلام.

05 يوليو، 2009

ومرت خمس سنوات ...

السلام عليكم ورحمة الله وبركاته،
يااااااااه...
دا العمر بيعدي صاروخ، أوام كدة عدت خمس سنين، اه والله الواحد فجأة كدة بص لقى نفسه خلص.
كنا لسة من قريب بنفكر هندخل كلية إيه وقسم إيه.... وفجأة كدة خش ناقش مشروع تخرجك!!!
لسة الكلام دة كان امبارح، بالظبط يوم 4/7/2009
يوم لن ينسى بسهولة من ذاكرة دفعتنا الغالية، يوم التخرج، يوم الخلاص، يوم الإفراج،... قول إللي أنت عايزه.
هو طبعاً الواحد مهما كانت دراسته جميلة وكليته كذلك بيكون فرحان عند التخرج والتخلص من الدراسة ما بالك إذا كان لديه معاناه فيما سبق ذكره.
طبعاً أنا مش هغلط في الكلية ولا حاجة ذي ما ناس بتعمل وتقول كلام مالوش لازمة، بس الحياة مش لونها بمبي ولا حاجة، يعني أكيد الواحد لازم يعاني في حاجات كتير.

أما عن الاستفادة من الكلية...
برضو في ناس بتخش شمال أوي بطريقة تضايق، يعني ماينفعش تقول أنا لم استفد شىء، بس أنا اقدر أقول بكل ثقة إن ما تعلمته واستفدته لا يستحق 5 سنين من العمر، أو بمعنى آخر ما حصلت عليه ليس بالقدر المتوقع والمفروض حصوله.

يا ترى إللي جاي أحسن من إللي راح.... إن شاء الله يكون كذلك.

ياترى لسة فيه مذاكرة ودراسة فيما يأتي.... طبعاً
أصل تحصيل العلم لا ينتهي والانسان لا يكف عن التعلم طوال حياته، ولكن هناك فرق:
التعلم في الحياة وبالخبرات والتجارب يكون ممتع نوعاً ما، وخصوصاً التعلم الذاتي تكون المتعة فيه مضاعفة، كما أن الانسان عندما يتعلم بمزاج بيكون له مزاج وهو بيتعلم، غير لما يتعلم حاجات كتير بالغصب وهو غير مقتنع ببعضها ولا يستطيع فهم البعض الآخر.

المهم كفاية كدة وربنا يسهل لنا ولكل الشباب ونشتغل بسرعة .

سلام

15 يونيو، 2009

تعديلات في برج التقطير (HYSYS)

السلام عليكم ورحمة الله وبركاته،

في آخر فيديو اتكلمت فيه عن مثال لتكرير الخام، وطبعاً كن فيه برج تقطير، بس البرج كان absorber ومفيش reboiler فيه.

انهاردة بقى عملت شوية تعديلات، يعني مرة لو إننا من الأول حبينا نستخدم برج بـ rebloiler ، ومرة لو عندي البرج فعلا تم تصميمه وبعدبن حبيت اضيف له الـ reblioler ، وكدة يعني.
الكلام ده في فيديو مقسوم على جزئين ضغوطين والروابط اهية

http://www.4shared.com/file/111978030/d2f5498d/columns3part1.html

http://www.4shared.com/file/111989920/fed3b3f7/columns3part2.html

كدة تمام ... سلام

12 يونيو، 2009

بئس الكورة


السلام عليكم ورحمة الله وبركاته،
أكيد طبعاً كلكم لاحظتم معي إنه في الفترة الأخيرة دي الاهتمام بالكورة – قصدي كرة القدم يعني – قد زاد، وزاد أوي أوي.

فعلاً الحكاية دي ملاحظها من مدة، ويقدر أي واحد يلاحظ الكلام ده من أكتر من ناحية، خد عندك مثلاً التشجيع، أصبح الكل يشجع كورة حتى لو ملوش فيها، الكبار والصغيرين والعيال ... وحتى البنات، آه الشباب منهم يعني، يعني عمري ما كنت أشوف بنات في المدرجات إلا نادراً – وأنا أقصد في مصر – ، لكن دلوقتي اصبحوا كتيير وكمان ملونين وشوشهم بالعلم وهيصة.

كمان تلاحظ ده من البرامج الرياضية على القنوات الفضائية، أصبحت كتيرة بغباء، وطبعاً الرياضة كلها تم اختصارها في كرة القدم وبس.
كل الكلام ده ممكن ننفضله ونسيبه في حاله، بس إللي عايز أتكلم عنه هو مدى الهيافة والتدهور العقلي والأخلاقي وفي كثير من الأحيان – ومعلش فالكلمة – الغباء، إللي وصلنا له بسبب الكورة.

أنا بقول ده ليه، لأن الكورة لم تعد مجرد لعبة تلعب وتشاهد من أجل التسلية أو التمتع بالوقت، بل سيطرت على تفكير وعقول الناس ولحست مخهم.

خد عندك مثلاً، واحد يسيب شغله وأكل عيشه عشان يروح القهوة يشوف الماتش، اصله متشفر، دا طبعاً ناهيك عمن يترك الصلاة اصلاً من اجل نفس السبب.

نفس الحكاية في الطلاب، طالب ممكن يكون عنده امتحان تاني يوم وينزل يضيعله ساعة ونص دا غير نص ساعة رايح جاي عشان الماتش ويقولك معلش أصله نهائي اوروبا، برغم انه معندوش استعداد يضيع ربع الوقت ده يقرأ فيه قرآن.
الوكسة والمصيبة الكبيرة كمان في التشجيع، وطبعاً أهمها بين الاهلي و الاسماعيلي، وبما إن أنا من الاسماعيلية فأنا بشوف الحكاية دي لايف.

يعني مثلاً حكاية حسني عبد ربه المشهورة – أنا مليش دعوة بحسني في حد ذاته – طلعوا المشجعين، الجدعان، المخلصين للنادي، الرجالة..!!! ونادوا بتمزيق حسني والانتقام وإللي مش عارف إيه عشان مايروحش الاهلي، لأ وطلع واحد قال: "المحافظة تحط مبلغ على فاتورة الكهرباء وتلم الفلوس وتتدفعها عشان يفضل عندنا" الصراحة كان هاين عليّا ألبه لبة تخمده، طب وأنا مالي، يعني يوم ما تكسبوا هتردلي الفلوس بتعتي، ولا أنا هأكسب إيه إن شاء الله غير حلوتك يا مقطقط.

وكان آخر حاجة الماتش النهائي بين الاهلي والاسماعيلي وإللي كسبه الاهلي، كان قبله في ماتش لكل واحد فيهم مع فريق تاني وحصل إللي حصل، وكنت حاضر آخر شوية من ماتش الاهلي مع بعض الاصدقاء، وهوبة الاهلي جاب الاجوان وكسب الماتش وشوفت هيافة بدرجة لا توصف من صحابي مع كل جون، وخد دي بئا، لما خلص وجابوا شكل فريق الاسماعيلي وهو محسور من فوز الاهلى قام قال واحد فيهم: "بس كدة أنا معدتش عايز الدوري، كفاية عليّا المنظر ده" ، يا لاللي، تحولت كل شعارات التنافس والكلام ده في مجرد رؤية الفريق الآخر حزين، معدتش القضية نكسب وناخد الدوري ولاّ الكاس، المهم الفريق التاني مايخدش حاجة.

ولما فاز الاهلي، طلع برضوا الاسماعيلاوية وشتموا والحكم ظالم والاتحاد ظالم والجمهور ظالم والكورة والبلف بتاعها ظالمين وتييييييييييييت، لدرجة إن فيهم من قال:" لو الاهلي لعب مع إسرائيل، هشجع إسرائيل" !!!!!!!

عشان كدة أنا سميت الموضوع بئس الكورة:
بئس الكورة التي تلهي عن الصلاة وأي عبادة
بئس الكورة التي تعطل عن العمل
بئس الكورة التي تولد الحقد والكراهية
بئس الكورة التي تلغي معاني الولاء والبراء
بئس الكورة التي تورث التفاهة وسوء الخلق
بئس الكورة التي تدمر الأمة

وعلى النقيض فأقول
أهلاً بالكورة كرياضة للجسم تنشطه وتقويه
أهلاً بالكورة التي تنمي روح التعاون والعمل كفريق واحد
أهلاً بالكورة للترويح عن النفس حتى لا نمل

وياريت فعلاً نفهم حياتنا صح، ولو عايزين نلعب نلعبها صح ذي ماهما عرفوا يلعبوها صح ... والحدق يفهم ........

معلش أنا طولت فالكلام، بس استحملوني، والسلام عليكم

06 يونيو، 2009

عذراً دوت نت

السلام عليكم ورحمة الله وبركاته،
مش عارف ليه وأنا بـ اقرأ التدوينة إللي فاتت بتاعت (عايز أبرمج) حسيت إن كلامي عن الفيجوال دوت نت كان مش ولابد – وإن كان من غير قصد – بس لاقيت إنه ممكن يتفهم غلط فحبيت أوضح العملية شوية.
في البداية، أنا طبعا لسة عند كلامي وهو إن الفجوال دوت نت تعتبر سهلة جداً – أو ذي ما قلت سهلة بوئلة – بس مش المقصود إنها مثلاً لغة أطفال وتدوس على بطنها تسقف وكلام من ده، بس المقصود إنها فعلاً من أسهل اللغات الموجودة حالياً، فالحاجة المتعبة في الفيجوال 6 مثلاً بتعملها بسرعة وسهولة أكبر، لكن في الأول والآخر دي لغة برمجة، يعني جمل بنائية وطرق ودوال وكلام من الخنيء ده.
تاني حاجة وهى لمّا قلت إنها بتاعت تطبيقات نت وبرامج موبايل، ده مش تقليلاً لكفاءة اللغة ولا حاجة، بس ده يعتبر إللي بدأ يميزها عن الفيجوال 6، وهو إنها أسهل وأحسن في المجال ده، بس برضوا بتعمل الشغل التاني بتاع الفيجوال6 وعادي يعني.
أختم بحاجتين، أولهما: الفيجوال دوت نت جديدة وسهلة وبدأت تطغى على فيجوال6، وخصوصاً بعد أن توقف دعم مايكروسوفت لفيجوال6، لكن ذي ما اتفقنا الحلو ما يكملش، ومفيش لغة ملهاش عيوب.
تانيهما: وإن كنت من مستخدمي فيجوال6، بس لو حد محتار بين 6 و دوت نت، فأنا بأنصحه بالدوت نت – أسهل وأحدث و... – وذلك إن كان لم يتعلم شىء في الفيجوال6، وإلا فلها حسابات اخرى، وعموماً فإن أي شخص بيشتغل مع لغة برمجة عارف كويس الجملة دي: " لو كانت اللغة x تلبي طلباتك فكن مبرمجاً للغة x ، وإن كانت اللغة x لاتلبي طلباتك فلاتكن مبرمجاً للغة x ".
خلصت الختمة، والسلام عليكم.

13 مايو، 2009

تكرير البترول باستخدام HYSYS...

السلام عليكم ورحمة الله وبركاته،
المرة دي بنكمل شرح برنامج HYSYS من خلال مثال عن تكرير البترول.
طبعا تكرير البترول (تقطيره) من أهم الحاجات إللي كان لازم اتعلمها على ال HYSYS وده لأنه تخصصي الأول، وكمان مهم للمهندس الكيميائي.
وتعتبر مشكلة الخام في ال HYSYS ، او بمعنى اصح أهم حاجة هي إذّاي نعرف الخام في البرنامج ونختاره بعد كدة من المركبات المستخدمة في المثال.
كل الكلام ده إن شاء الله تكلمت عنه في 3 فيديوهات خلال الشرح الكامل لمثال لل OIL REFINING.
بالنسبة لل you tube لسة شوية على ما احط كل الفيديوهات عليه – معلش استحملوني – لكن الفيديوهات متاحة على روابط مباشرة للتحميل، وأحب هنا بمناسبة ذكر روابط التحميل أن أوجه شكر خاص لصديقي العزيز : أحمد عبد القادر ، لمساعدته لي في رفع الفيديوهات، وكمان الصديق العزيز : أيمن اللبان ، لمساعدتي أيضا في رفع فيديوهات الجزء الأول (gas processing).
نيجي للروابط: وفيها تم تقسيم كل فيديو لمجموعة ملفات مضغوطة تسهيلا لعملية التنزيل، عند تنزيل الملفات لكل فيديو معين يتم فك الضغط فينتج هذا الفيديو في ملف واحد (.avi) – طبعا طريقة معروفة – .
وفيه ملف pdf وضعت به بيانات المثال اللي بشرحه.
نبدأ بسم الله:-
1. الفيديو الأول:-

2. الفيديو التاني:-

3. الفيديو التالت:-

4. ملف البيانات:-

وبكدة تكون خلصت الليلة، ونتوقف قليلا لغاية ما ذاكر حاجة جديدة اقدر اعملها.
ياريت الناس تستفيد وتبلغني رأيها في الشغل ده، يعني اكمل ولا لأ.
وطبعاً ما تنسونيش من صالح دعائكم....
والسلام عليكم ورحمة الله وبركاته.

04 مايو، 2009

عايز أبرمج


السلام عليكم ورحمة الله وبركاته،
عايز أبرمج، عايز اعمل برامج، نفسي أتعلم لغة برمجة، ...
حلم جميل أصبح يراود رؤوس الكثيرين، خصوصا في ظل عصر التكنولوجيا والتطور المذهل للإلكترونيات، وانتشار الكمبيوتر في كل مكان واقتحامه لمعظم المجالات وحتى ابسط متطلبات الحياة البسيطة.
كفاية بقى نحوي... المهم، الموضوع ده بجد انتشر وبقى فيه ناس كتير عايزة فعلا تتعلم البرمجة بس مش عارفة إزّاى، وتبدأ منين...
طبعا من غير فزلكة، إللي عايز يتعلم برمجة يعني عايز يتعلم لغة برمجة – فقيق أنا – بس المشكلة إن كتير مش عارف يتعلم أي لغة بالظبط.
لغات البرمجة بقت كتير والسؤال الأساسي هو: هي إيه أحسن لغة برمجة؟
طبعا لان أي واحد نفسه يخش فالبرمجة على تقيل ويريح نفسه ويتعلم أحسن حاجة عشان مايوجعش دماغة ويضطر يتعلم كذا لغة أو حتى يلاقي اللغة إللي اتعلمها مش أد كده.
بس للأسف إجابة السؤال ده هي:
مفيييييييييييييشش!!!!!
ممكن ناس تقلب عليا وتقول يا عم ده واد تيت وتقلب الموضوع وتمشي، بس أنا برضو مُصر، لان مفيش لغة فعلا تعتبر هي أحسن لغة.
طبعا ناس هاتنزل بالكلام المحفوظ عن مميزات اللغة إللي بيستخدموها وشايفيين إنها أحسن حاجة:
الفيجوال بيسك: لغة سهلة، اكوادها بسيطة – مقارنة بغيرها – ، بتتفاعل مع ويندوز وتطبيقاته، واجهة مستخدم جرافيك سهلة، ... إلخ
الفيجوال دوت نت: سهلة بوئلة، تطبيقات نت وبرامج موبايل يا معلم، وعيييييييييييش، ... وبرضو إلخ
السي بلس بلس: جامدة مولّة، بتاعت المحترفين والمعلمين التقال، تعمل بيها كل حاجة، فيها توريث و برمجة شيئية، ..... وإلخ برضو
كل ده كلام كويس، بس فيه حاجة صغيرة، زي ما كل لغة من دول ليها مميزات، لازماً وحتماً ولابد يكون فيها عيوب، يا أخي ولو عيب صغير مش كله مميزات في مميزات محسسني إنك بتتكلم عن خضرة الشريفة!!!
فعلا كل لغة ليها عيوب، وممكن تكون عيوب تقيلة كمان.
طب إيه الحل يا فزلوك؟؟
الحل في إيدك أنت، أنت إللي تحدد أحسن لغة برمجة،... بالنسبة ليك.
السؤال إللى مفروض يتسئل هو: أنت عايز تبرمج ليييييييييه؟؟؟
يعني عايز فعلا تبقى مبرمج متخصص وتعمل برامج متكاملة في كل حاجة، وتصميم شبكات، ومالآخر تبقى بيل جيتس.
ولا عايز تعمل باتشات وحاجات تروش بيها على صحابك وتبقى الواد التوتّي فروتّي وخلاص.
حسب دماغك، أنت إللي تحدد اللغة إللي عايزها. يعني اللغة الفلانية لو شايف إنها تحققلك إللي أنت عايزه، خلاص دووس فيها.
من وجهة نظري:
لو فعلاً عايز تبرمج شغل تقيل وشبكات اتصالات وأنظمة تشغيل وبرامج كبيييييرة، ومش فارق معاك تقعد أد إيه تتعلم على ما تحترف، عليك وعلى السي بلس بلس – وربنا يديك ويدينا طول العمر – أو ممكن سي شاب بس مش متأكد من إمكانياتها بس هي أسهل من بلس بلس.
لو عايز تتعلم بسرعة وسهولة، في وقت قليل نسبياً، برامجك معظمها مش معقدة برمجياً – يعني هندسية ومحاسبية إللي اعتمادها بيكون على معادلات مش جمل برمجية – يبقى روح على فيجوال بيسك وأنت مطمن.
لو دماغك برامج بسهولة.. أوي، وشغل نت وموبايلات وحركات، فيجوال دوت نت هى سبيلك.
الجافا مليش فيها ومانصحكش تجربها، إلا إذا كنت تقصد الجافا سكريبت عشان صفحات النت، دي حاجة تانية.
طب وبعدين، آخد الحاجة معيوبة يعني، اعمل إيه في عيوب اللغة إللي اخترتها.
عموما طالما اللغة متناسبة مع دماغك مفيش عيوب كتيرة هتلاحظها، لكن برضو اطمن، كل لغة وراها رجالتها إللي لايمكن يسيبوها.
هتلاقي دايماً أدوات خارجية: تحديثات ومكتبات واشتغلات كتيير اتعملت عشان تعالج العيوب دي، وكل ما تحترف اللغة اكتر فرصتك فالفوز تكبر، اقصد تمكنك منها ومن تخطي العقبات والعيوب بها هايزيد.
كفاية كدة انهاردة أحسن صدعت.
والسلام عليكم ورحمة الله وبركاته.