حجب المواقع الإباحية من خلال ال DNS / OpenDNS

السلام عليكم ورحمة الله وبركاته

موضع النهاردة تقني شوية، وطويل شويتين، لكن الكل بيحتاج له، نظراً لأنه عن موضوع بيشغل بال الكثير منا، ألا وهو إزاي نمنع فتح المواقع الإباحية على الأنترنت من خلال الكمبيوتر بتاعنا، سواء بقصد أو بغير قصد كما يكون الحال في الإعلانات من بعض المواقع، وخصوصاً مواقع رفع/تنزيل الملفات، ولا سييما إذا كان اللينك من منتدى أجنبي.

طيب، كدة عرفنا الهدف من المقال، هو منع فتح المواقع دي، الخطوة إللي جاية هي معرفة طريقة القيام بذلك.

أولاً أود الإشارة إلى أن فكرة الموضوع كان الأساس فيها موضوع لأخي صبحي صاحب مدونة الدرب بعنوان " طريقة حجب المواقع اللاأخلاقية والمؤذية بدون أي برامج إضافية "، ولكن تدونتي دي لا تعتبر قص ولصق ولا سرقة موضوع ولا حاجة، وده لسببين:

1. أنا أخذت الفكرة فقط، ولكن فيه زيادة لتفصيل وتوسع في التحكم بهذه الطريقة.

2. مدونة الدرب مختصة في البرامج المفتوحة واللينوكس، ولذلك ركز أخي صبحي على عرض الطريقة في نظام أبونتو/لينوكس، على العكس هنا وهو إني هركز على الشرح لنظام ويندوز، ويمكن ده سبب لوضعي رابط موضوع مدونة الدرب لكي يكون هناك تكامل للموضوع على نظامي التشغيل.

نخش في الموضوع...

من عنوان التدوينة نستنتج إننا هنستخدم حاجة اسمها ال DNS لحل هذه المشكلة، وعليه فلازم في البداية نعرف يعني إيه DNS.
باختصار شديد وبكل بساطة، ال DNS ده اختصار ل Domain Name system... شفت الموضوع سهل إزاي D:


معنى ال DNS هو زي أجندة أرقام التليفونات إللي عندنا، وأنا عن نفسي بحب اشبهها بسكرتيرة سويتش التليفونات، وتعالوا نشوف المثال ده:

عايزين نتصل بشركة س للخدمات، هترفع سماعة التليفون وتقول للسكرتيرة اطلبيلي شركة س للخدمات، هتروح هي جايبة رقم الشركة ومتصله بيه، وبعدين تحولك على الخط.
المثال ده فيه النقاط التالية:
1. أنت أردت الإتصال بشركة معينة عارف اسمها.
2. التليفونات (متمثلة في السنترال و التليفون نفسه) مايعرفش أسماء شركات وإنما كل ما يستطيع التعامل معه هو أرقام للتليفونات وبس.
3. لذلك لجأت للسكرتيرة، وهي بدورها طلعت الرقم الخاص بالشركة إللي أنت عايزها واعطته للتليفون فتم الإتصال.
4. في النهاية أنت اتكلمت مع الشركة إللي أنت عارف اسمها، ومن غير ما تعرف رقمها ....


ده بالظبط إللي بيحصل في النت مع الكمبيوتر وال DNS:
1. أنت عايز تتصل بموقع معين عارف اسمه ولكن de7ayaty.blogspot.com، والاسم ده بيطلق عليه Domain.
2. الأنترنت (متمثل في شبكة الأنترنت والكمبيوتر نفسه) مايعفش أسماء المواقع، وإنما كل إللي يعرفه رقمهم (الآي بي)، ويكون 1 و 0 وبس.
3. لذلك نلجأ لل DNS، وهو بدوره بيحول اسم الموقع إلي الآي بي المقابل له ويعطيه للنت فيتم الإتصال.
4. في النهاية أنت اتصلت بالموقع إللي أنت عارف اسمه ومن غير ما تعرف الآي بي بتاعه...


أظن معدتش محتاجة أي توضيح.


بعد كل الرغي ده (كعادتي) نيجي بقى للطريقة، وهي بتتمثل في إننا بنظبط إتصال الأنترنت عندنا عشان يستخدم DNS معين فيه خاصية فلترة المواقع فيمنع المواقع الإباحية وغيرها.
الوضع الإفتراضي لإتصال الأنترنت إنه بيعين ال DNS اوتوماتك، يعني أول DNS فاضي يلاقيه في وشه يستخدمه، وده مش تمام لأن ممكن ال DNS ده يكون بطيء أو مفهوش فلترة ( وده الغالب) عشان كدة إحنا بنستخدم DNS محدد.


من اِشهر مقدمي خدمة ال DNS هم:

OpenDNS

DynDNS

وطبعاً جوجل مابتسبش حد في حاله

Google Public DNS

وأنا إن شاء الله هشرح الاستخدام ل OpenDNS، بسم الله نبدأ.


1. روح على My network places، واختار View Network connections.
2. اختار الكونكشن إللي أنت شغال عليها (لأن أحياناً في ناس بيكون عندها اكثر من كونيكشن) وكليك يمين وأختار Properties.

3. من صفحة properties إللي اتفتحت اختار internet protocol (TCP/IP) ثم اضغط properties.

4. من الصفحة التي ستظهر اختار use the following DNS server adresses، ثم أدخل الأرقام التالية في مكانها المبين في الصورة

preferred DNS server: 208.67.222.222

alternate DNS server : 208.67.220.220

5. بعد كدة دوس ok ثم ok ثم close.
وبس كدة.

استنى لمدة 3:5 دقائق وجرب عشان تشوف النتيجة، وطبعاً مش هقولك على موقع من إياهم، ولكن خش على الرابط ده، ولو كانت الخدمة اتفعلت معاك فعلاً هتلاقي الصفحة بتقولك إنك بتستخدم OpenDNS. (الصفحة دي OpenDNS هي إللي عاملاها)
وللتوضيح، فكل إللي عملناه إننا وضعنا رقم إي بي السيرفير بتاع openDNS عشان يستخدمه ك DNS server، ومن ذلك نستنتج إن الخطوات مع باقي الشركات بتكون متشابه، مع تغيير ارقام الأي بي للرقم الخاص بالشركة، يعني مثلاً خدمة جوجل أرقامها بتكون: 

8.8.8.8

8.8.4.4

شوفتوا الواسطة ...   D:

بكدة تكون خليت جهازك يستخدم DNS مميز، ومن أهم مميزات سيرفرات ال DNS غير إنها بتمنع المواقع الإباحية والمضرة وإللي فيها فيروسات وخلافه، إنها بتزيد من سرعة التصفع وسرعة الوصول للمواقع.


بس فيه خطوة كمان فاضلة، وإن كان البعض لا يراها ضرورية، لكن أنا شايفها مهمة ومفيدة، وهي إنك تشترك على موقع OpenDNS، وده ليه عدة فوائد من أهمها، إنك تقدر تحدد مستوى الحماية إللي أنت عايزه، وكمان لو فيه موقع معين مش عايزه يفتح وهو بيفتح، تقدر تضيفه لقايمة تمنع فتح المواقع التي فيها، والعكس أيضاً.


عشان كدة هنشرح مع بعض طريقة التسجيل في الموقع :


1. طبعاً روح للموقع بتاع OpenDNS من هنا.
2. من أعلى الصفحة اختار Create account.
3. اختار OpenDNS basic عشان هو الحساب المجاني، ودوس sign up.

4. قم بملء البيانات المطلوبة ثم اضغط continue، ولحد هنا يكون الحساب قد تم انشاءه، ويبقى إن فيه رسالة تأكيد هتوصلك على الإيميل بتاعك عشان تأكد بيها الحساب.


الصفحة إللي هتجيلك بعد كدة هتكون بالمنظر ده:

وفيها ثلاث اختيارات:
1. computer: وده هيدخلك على صفحة ترشدك لطريقة استخدام OpenDNS لجهاز الكمبيوتر، بالظبط ذي ما عملنا مع بعض من شوية، ولكن تفرق في إنه في شرح لتطبيق الطريقة على جميع أنواع انظمة التشغيل المختلفة.
2. Router: وده هيدخلك على صفحة تشرحلك إزاي تقدر تستخدم ال OpenDNS على الروتر كله، بحيث إن كل الأجهزة إللي واخده نت من الروتر ده هتستخدم OpenDNS.
3. Server: ودي لأصحاب السيرفرات.


بعد كدة بقى هنظبط الحساب بتاعنا على مزاجنا من خلال الخطوات التالية:
1. من صفحة الموقع الرئيسية هندخل بالحساب بتاعنا وندخل على ال dashboard.
2. نختار بعد كده Settings.
3. من الصفحة إللي هتفتح هنكتب عنوان الأي بي بتاعنا الموجود في أعلى الصفحة في المكان المحدد تحت كلمة add network.

4. بعد كدة اضغط على add Network.
*واحنا بنعمل كدة عشان نقدر نظبط الإعدادات إللي عايزنها من مستوى حماية ومنع/إباحة مواقع معينة إلى آخره.


5. بعد إضافة الأي بي، هندخل على الشبكة إللي ضفناها، عشان نظبط الاعدادات، وهتكون صفحة الإعدادات بالشكل ده:

6. من الجزء الأول في الصفحة تحت عنوان choose your filtering level تقدر تختار مستوى الحماية إللي أنت عايزه، وتقدر تعمل لأي مستوى فيهم view عشان تشوف هيعمل إيه بالظبط، وكمان تقدر تختار customize عشان تحدد الإختيارات إلي أنت عايزها بنفسك.
وبعد كدة تدوس Apply


7. في الجزء الثاني تحت عنوان Manage Individual Domains، ودي تقدر تكتب فيها أي موقع ثم تختار Always block عشان يحجب هذا الموقع من الظهور لديك، أو never block عشان يفضل شغال معاك على طول.


8. لو بصينا في الجنب الشمال كدة، هنلاقي عدة اختيارات منهم مثلاً customization، ودي تقدر من خلالها تعديل أو تظبيط الصفحة إللي هتظهر عند محاولة الوصول لموقع تم حجبه، فممكن تختار صورة تحملها تكون اللوجو للصفحة بدلاً من لوجو الموقع، والرسالة إللي بتبقى مكتوبة،...  إلى آخره.


أخيراً وبعد إطالة كبيرة، يبقى إني أقولك، يستحسن إنك تحمل البرنامج الخاص بالموقع لعمل تحديث اوتوماتك للأي بي بتاعك في حالة إنه اتغير (وده أكيد هيحصل لو أنت من مصر لأن الأي بيهات عندنا في مصر ديناميكية Dynamic IPs ) فهو بيعمل تحديث للأي بي أول ما يتغير.
لتحميل البرنامج: اضغط هنا.

ووووووووووووويييييييييييو


الحمد لله أنا كدة خَلصت، و خِلصت

أشوفكم على خيرفي المرة إللي جاية

وتصبحوا على خيييييييييير.

البرامج الحرة والمفتوحة المصدر 2

السلام عليكم ورحمة الله وبركاته،

في التدوينة إللي فاتت دي على طول وإللي كانت بعنوان البرامج الحرة والمفتوحة المصدر، بدأت الكلام عن الموضوع ده، وإن كنت حاولت إني اختصر في الكلام، لكن كعادتي رغاي شوية والموضوع فتح مني، فاضطررت لعمل جزء تاني أكمل فيه الكلام.

وكنت المرة إللي فاتت توقفت في الكلام عند البرامج الحرة والمؤسسة بتاعتها وفكرتها إيه، وختمت الكلام ببعض ملاحظاتي (تقدر تقول مؤاخذاتي) عن المؤسسة دي والكلام بتاعهم، وقلت إني لقيت حاجة تانية بتعدل من فكرة البرامج الحرة عشان تتناسب مع ملاحظاتي، ألا وهي البرامج مفتوحة المصدر، وبمعنى أصح مبادرة البرامج مفتوحة المصدر.

لو حبيت تعرف الفرق بين الأثنين، هتلاقي العملية صعبة شوية، لأن كل واحدة فيهم حاطة شروط للتعريف، لو بصيت فيهم شوية كدة هتحس إنهم حاجة واحدة تقريباً، رغم إن البرامج الحرة عشر شروط والمصادر المفتوحة أربعة بس، بس هتلاقي نفس الكلام تقريباً، وناس كتيير بتقول إنهم وجهان لعملة واحدة، أمال بقى إيه الفرق...

أولاً، هو بالفعل فيه فرق، ويكفي إن مؤسس البرمجيات الحرة بيرفض إلى الآن أن يطلق على مؤسسته أو نسبتها للبرامج مفتوحة المصدر، لأنه متأكد تماماً أن المصادر المفتوحة لها أهداف تخالف ما يريده.

ثانياً، المصادر المفتوحة بتنظر للعملية من وجهة علمية تكنولوجية، بعكس البرامج الحرة إللي وجهة نظرها فلسفية ومثالية زيادة عن اللزوم زي ما قلت المرة إللي فاتت.


ثالثاً، ودي من أهم النقاط، إن المصادر المفتوحة شايفة إننا ممكن نعيش مع البرامج الحرة والغير حرة في نفس الوقت، يعني حبايب وأخوات، بعكس البرامج الحرة إللي شايفة إننا لازم نقضي على البرامج الغير حرة والمملوكة، وإن العالم كله لازم يبقى برامج مفتوحة المصدر.


وهي دي بذرة الزتونة ((: هو ده إللي كنت بقول عليه، إني مش لازم اتحول بنسبة 100% للبرامج المفتوحة، وإن لازم تكون لي الحرية في اختيار البرنامج إللي عايز استخدمه سواء كان حر أو غير حر، وكمان لازم تكون عندي الحرية في تشغيل برامج حرة من أنظمة تشغيل غير حرة ، وتشغيل برامج غير حرة من أنظمة تشغيل حرة.


كدة أنا استريحت لما لقيت الكلام ده، وكدة تكون التدوينة شبه أنتهت، بس فيه حاجة أخيرة هختم بيها، وهي تلخيص للتدوينتين والفكرة منهم في بعض النقاط السريعة بعضها مستوحاة من رد صديقي العزيز أحمد القصص على التدوينة السابقة، والبعض الآخر من أفكار وملاحظات متناثرة تعتبر هي قلب فكرة التدوينتين:


1. لايمكن أبداً إنكار مكانة شركة مايكروسوفت، وإنها شركة عملاقة في مجالها، وفعلاً بتقدم خدمات وحلول كبيرة وقوية، وإن كانت بالفلوس ومش حرة، بس زي ماقلت أنا مش ضد البرامج المغلقة المصدر أو المملوكة، ولكن بقول إنها تخف من شروطها شوية ... وبس.


2. في ناس لما بتيجي تتكلم عن البرمجيات الحرة بتخش شمال في مايكروسوفت وغيرها، وبتصورهم إنهم شوية نصابين أو ماشابه، ودا كلام مانوا زيين D:


3. بعض الكلام إللي بيتقال عن مايكروسوفت ومثيلاتها مفهوش غلط، وإنما فيه وجهة نظر محترمة، وهي إن مايكروسوفت بتساعد على نشر الويندوز وحتى النسخ المكركة منه، عشان بعد كدة تستغل حقوق الملكية بعد مانكون منقدرش نستغنى عنها وتصبح هي المتحكمة كيفما تشاء، ودي وجهة نظر لابد أن تأخذ في الإعتبار.


4. في بعض الأخوة العرب بلاقيهم متحمسين زيادة عن اللزوم للبرامج المفتوحة وواخدين وجهة نظر مؤسس البرمجيات الحرة بطريقة صعبة أوي، لدرجة إني لقيت واحد بيقول إنه ترك استخدام توزيعة الأبونتو من لينوكس وراح لتوزيعة تانية، قال إيه عشان توزيعة الأبونتو لا تمانع من استخدام برامج غير حرة من خلالها، بقة ده اسمه كلام يا عالم...


5. الحكاية مش حكاية أنا مع البرامج الحرة ولا مع المصادر المفتوحة ولا مع البرامج المملوكة، هي تكنولوجيا متاحة وتوفر لنا في الفلوس، وتزيد من الحماية وبعض الخواص الأخرى، فناخد من كل واحد الحلو إللي فيه، ونسيب الوحش،لأن كل حاجة أكيد فيها الحلو وفيها الوحش، والعملية مش شروة واحدة يا تاخدها كلها يا تسيبها كلها.


مش عارف أنا نعدش عندي كلام تاني أقوله، أو بمعنى أصح مش قادر أكتب أكتر من كده، فالموضوع كدة كفاية أوي، وممكن بعد كدة أبقى اكتب عن بعض تجاربي مع اللينوكس وأخواته...

وسلام بقى

البرامج الحرة والمفتوحة المصدر

السلام عليكم ورحمة الله وبركاته،

منذ عدة أشهر ( من أول سنة 2010 تقريباً ) كنت بدأت أسمع كثيراً عن البرامج الحرة والمفتوحة المصدر، وكنت قبل كدة بسمع عنها على خفيف كدة من خلال معرفتي الضئيلة جداَ جداَ بنظام التشغيل لينوكس، لكن خلال الفترة دي قرأت كتير عن البرامج الحرة ومفتوحة المصدر بوجه عام وعن نظام التشغيل لينوكس بوجه خاص باعتباره اشهر حاجة بيتكلم عنها لما تيجي سيرة البرامج الحرة، وكانت طبعاً توزيعة الأبونتو هي ما كنت اقرأ عنها من ضمن توزيعات اللينوكس المختلفة.

لو جبت الموضوع من الأول، فأنا قبل الدخول في القراءة عن مواضيع البرامج الحرة وماشابهها كنت بدأت اسجل اعتراضي عن بعض ما يتعلق بتراخيص البرامج، وبدأ الموضوع معايا لما كنت بتكلم مع واحد صاحبي عن نسخ الويندوز الأصلية،لأنه كان عايز يشتري واحده، فسألني: "طيب يعني لما أنا المفروض اسجل للنسخة من خلال النت (وخصوصاً الفيستا إللي كان الكلام عليها)، وهم عندهم هيتسجل إن النسخة دي بتاعت الشخص ده صاحب الجهاز ده... طب أفرض حبيت أغير جهازي، أو اشتريت لاب توب، أو جهازي ولع ومحتاج واحد تاني، معنى كدة إني مفروض أجيب له نسخة جديدة؟؟؟"
بصراحة أنا تنحت شوية، وبعدين لقيت مفيش غير رد واحد: "لو عايز تفضل مستخدم بنسخة أصلية مش مسروقة، يبقى أاااه، لازم تجيب له نسخة جديدة"

مش فاكر هو قالي إيه بالظبط بعدها، بس إللي فاكره إنه سابني ومشي، ومشتراش نسخة أصلية لحد دلوقتي.....

وبعد الموقف ده، بدأت افتكر تاني كل المناوشات إللي كانت بتحصل بيني وبين نفسي عن النسخ الأصلية للبرامج، والشروط إللي الواحد لازم يمشي عليها، أو بمعنى أصح بتفرض عليه لما يشتري أي برنامج.

هو يمكن الموضوع عندنا مش واضح أوي لأننا تقريباً نسبة إللي بيستخدموا نسخة ويندوز أصلية تكاد تكون معدومة، فكلنا شغال على النسخ المكركة والذي منه، دا غير إن فيه ناس معتقدة إن ده هو الطبيعي، وإن الخمسة عشرة جنيه إللي بيدفعها في الإسطوانة هو ده الثمن، وبس.

عشان كدة أنا ومن دلوقتي بوضح إن كلامي هيكون على إللي مفروض يحصل وإللي بينص عليه التعاقد في رخص البرامج، وكل شوية هوضح الحكاية دي في وسط الكلام عشان الناس إللي بتنسى.

التدوينة دي مش لشرح البرامج الحرة والمفتوحة المصدر بالتفصيل، وإنما هعرض فيها بشكل سريع كدة الفكرة في البرامج الحرة والمفتوحة المصدر مع كتابة بعض ملاحظاتي عن الموضوع ده عند الحاجة لذلك، أما إللي عايز يقرأ بالتفصيل عن المواضيع دي فممكن يشوف أي رابط من دول:

موقع مؤسسة البرمجيات الحرة

موقع مشروع جنو

موقع مبادرة المصادر المفتوحة

البرمجيات الحرة من ويكيبيديا

المصادر المفتوحة من ويكيبيديا

كل المواقع دي بالإجليزي طبعاً، ولو حد عايز معلومات بالعربي، ببساطة شديدة يكتب " البرمجيات الحرة" أو "البرامج مفتوحة المصدر" أو "لينوكس" في جوجل وهيشوف اللي ماشفهوش، وأنا انصح بالدخول لمجتمع اللينوكس العربي لأنه بجد منتدى جامد أوي ومفيد جداً في الموضوع ده.

نرجع بقى لموضوعنا، إيه هي حكاية البرامج الحرة دي.
باختصار شديد، الفكرة كلها إن مؤسسة البرمجيات الحرة دي قامت على فكرة إن البرامج يجب أن تكون حرة وغير مملوكة لأحد، يعني كل واحد له الحق في استخدام البرنامج ونشره والإطلاع على الكود بتاعه (ودي من أهم الحاجات) وكده يعني.
وبسرعة وقبل ما حد يفهمني غلط، في عدة نقاط لازم أوضحهم:

1. أولاً الموضوع كله عن البرمجيات وبس، ملوش دعوة بحاجة تانية.
2. البرمجيات الحرة تعتبر في الأساس زي ماتقول كدة حركة اجتماعية اكثر منها تقنية وبرمجية، فهم ينظرون للمسألة من ناحية فلسفية نوعاً ما.
3. أكثر ما دفع مؤسسي هذه المنظمة للفكرة هي تمادي الشركات أصحاب البرامج الإحتكارية في الشروط التي توضع على استخدام برامجهم وإللي هم شافوا إنها بتقيد حرية الناس ( زي ماقلنا الحرية المتعلقة بالبرمجيات وبس).
4. العملية مش سبهللة، يعني فيه برضو شروط وقواعد وقوانين للبرامج الحرة، والتي يعد اختراقها بالظبط زي اختراق قوانين أي برنامج احتكاري آخر.

طيب بعد الكلام ده، مفهمناش برضو هم عملوا إيه؟؟

هم قالوا إن البرمجيات لازم تكون حرة، وفي شوية شروط كدة (تقريباً عشرة) لازم تتوافر في البرنامج عشان يبقى حر، من أهمها إن البرنامج يكون متوفر الكود المصدري له لأي حد يطلع عليه (إللي هو الكود البرمجي إللي اتكتب بيه البرنامج)، ويكون أي حد له الحرية في إعادة توزيع البرنامج والتعديل عليه وإعادة نشر هذه النسخة المعدلة.

دي أهم النقاط تقريباً، وإللي هيقرأ عن الموضوع بالتفصيل من أي رابط أنا كتبته في أول التدوينة أو من أي حتة تانية أكيد هيلاقي الشروط دي مرصوصة ومشروحة بالتفصيل.

وزي ماقلت من كام سطر فاتوا، في النقطة 4 بالتحديد، إن العملية مش سبهللة، يعني كل فرد له حق الإطلاع على الكود المصدري للبرنامج والتعديل، بس لا يحق له أخذ الكود وتحويل البرنامج لنسخة مغلقة المصدر أو ينسبه لنفسه دون تعديل، وكمان لو عمل تعديل يغير في الاسم ولازم يذكر البرنامج الأصلي إللي بنى نسخته الجديدة على أساسه، ومخالفة كل ذلك تعتبر مخالفة قانونية لرخصة البرنامج بالظبط زي أي مخالفة لتراخيص البرامج مغلقة المصدر مع فرق المخالفة.... مش قلتلك العملية مش سبهللة.

لحد كدة والكلام كويس أوي، بس واحد يسأل كويس في إيه؟؟
أقولك أنا ( ودي وجهة نظري الشخصية):

أولاً: هتلاقي البرامج غالباً مجانية بجد مش مسروقة ( أنا قلت غالباً لأن اتفاقية البرامج الحرة لاتمنع من بيع البرامج بمقابل مادي)، ولو البرنامج بيتباع، فلو أي حد اشتراه وإداه لزملائه أو حتى رفعه على النت لكل الناس فهو كدة مبيعملش حاجة غلط، لأنه له الحق في إعادة توزيع البرنامج، حتى لو أخد مقابل على كدة، ودي نقطة حلوة جداً وهتبعدنا عن الخلاف في حكم استخدام البرامج المسروقة وخلافه، والواحد فعلاًُ بيحس إنه ماشي صح ومحدش له عنده حاجة.

* النقطة دي كتير مننا مش هيحس بيها ولا هتفرق معاه لأني زي ما قلت في البداية الغالبية العظمى عايشة على البرامج المكركة وحاسة إن ده الطبيعي، وكمان عدم تطبيق قوانين حماية الملكية الفكرية مساعد على كدة، لكن لو واحد في امريكا مثلاً أكيد عارف أهمية الكلام ده لأنه ممكن بسهولة يقبض عليه عشان نسخة الويندوز بتاعته مش أصلية!!!

 ثانياً: وهي متعلقة بأولاً وبالملحوظة بتاعتها، وبكلامي مع صديقي إللي قلته في الأول، وهي التخلص من غباوة الشروط المستبدة احياناً لإتفاقية تراخيص البرامج الغير حرة، وهو إني لو عندي جهازين أو جهاز ولاب توب، فأنا قانوناً محتاج لكل جهاز نسخة لو بستخدم برنامج مملوك غير حر، بينما نسخة واحدة من البرنامج الحر تشبرئني أنا والعيلة كلها، يعني حتى لو بفلوس أنا برضو الكسبان.

ثالثاً: ودي نقطة مهمة أوي، وهي الحماية والأمان وضيف عليهم الإطمئنان، بمعنى إن حضرتك مثلاً وأنت قاعد دلوقتي على النت (شيء طبيعي أنك دلوقتي على النت طالما بتقرأ في المدونة) ماتعرفش جهازك بيعمل إيه، ولا هو بيبعت حاجة لحد أو بيتجسس عليك ولا لأ، هتقوللي إزاي ياعم، مهو مفيش حاجة بتتبعت قدامي أهي، أو ما أنا عارف كام كود دوس كدة ممكن يقولي، أو حتى عندي أنتي فايروس جامد بفاير وول خرافي، هقولك صباح الخيييييييييييير ....
كل إللي بتقوله ده ملوش أي لازمة، مفيش حاجة باينة أو أوامر الدوس بتقول مفيش حاجة بتحصل، دا زي بالظبط واحد حاطط قنبلة في علبة وكاتب عليها "عيش حياتك"، لأن الشركة صاحبة البرنامج (وفي الحالة دي مع الويندوز هتكون مايكروسوفت) هي الوحيدة إللي بتعرف إيه إللي بيحصل وبتظهرلك بس إللي عايزاك تشوفه، ومتقدرش تجبرها على غير كدة.
أما موضوع الأنتي فايروس والفاير وول، فدا برضو مشابه للي قبله، لأن الشركات المصنعة للأنتي فايروس لاتعلم شيئاً عن الأكواد الخاصة بالويندوز، ولا يمكن تكتشف حاجة برضو مايكروسوفت مش عايزاها تعرفها، وشوف بنفسك لو إن فيه فايروس جامد ضرب جهازك ومكنش عليه أنتي فايروس، وروحت مسطب الأنتي فايروس بعد ما الجهاز اتضرب، ولا كأنك عملت حاجة ومش هيعرف يشيل الفايروس لأنه خلاص اتمكن من الجهاز، وهيشتغل البرنامج ومش هيعرف يجيبه، فمابالك بالشركة المصنعة لنظام التشغيل نفسه.
أما في البرامج الحرة، فكود البرنامج معاك وتقدر تعرف كل فسفوسة البرنامج بيعملها وبيعملها ليه وإزاي، وحتى لو مكنتش بتعرف أي حاجة في البرمجة، فبرضو هتكون مطمأن، لأن فيه آلاف من محترفي البرمجة هيشوفو الكود بتاع البرنامج ده، ولو فيه أي ثغرة هتتعرف على طول، كما أن نشر الكود في حد ذاته هيخللي المبرمج عمره ما يفكر في وضع أي حاجة كدة في الاستخبس لأنه عارف إن في آلاف هيشوفوا الكود ده ومنهم ناس محترفين.

رابعاً: ودي تهم المبرمجين أكثر من أي حد، وهي نشر أكواد البرامج يساعد المبرمجين على تطوير مهاراتهم وقدراتهم، كما أن المشاركة في تحديث البرامج هتخللي البرامج دائماً في تطور كبير.

لحد كدة والكلام كويس زي ماقلت، وإن كان الكلام إللي فات يعتبر متحيز نوعاً ما للبرمجيات الحرة، وجيت على مايكروسوفت شوية، بس لأني فعلاً معجب ومتحمس لموضوع البرمجيات الحرة، ولكن على النقيض فيه برضو شوية ملاحظات على البرمجيات الحرة دي وهي:
 
1. أنا شايف أنهم محبكنها شوية، يعني حكاية إن البرامج كلها لازم تكون حرة صعبة شوية، خصوصاً على المبرمج إللي كتب البرنامج، أنا بصراحة مش معاهم في كدة، يعني أنا فعلاً مخنوق من البرامج الغير حرة في تعنتهم في الشروط الخاصة بإتفاقيات التراخيص للبرامج، ولكن برضو مش لازم الشركة تديني الكود بتاع برنامجها، يكفي إنها تغير وتطور من بنود الإتفاقية بحيث متبقاش خنقة أوي كدة، وتكون بحبوحة شوية (:

2. مؤسسة البرمجيات الحرة ترفض أن يتم استخدام برامج مغلقة واحتكارية على منصاتها ( انظمة تشغيلها يعني) وتبرر ذلك بأن عدم الإستخدام سيؤدي لتطوير برامج مماثلة وحرة، وده مبدأ مازال يصمم عليه مؤسس هذه المنظمة بالرغم من تطور بعض الأنظمة أو بمعنى أصح التوزيعات للينوكس بحيث أنها تسمح بتسطيب هذه البرامج الغير حرة ولكن دون دعم منها، طيب هو أنا افضل صايع كدة ومستني لحد ماواحد يتعطف عليا ويعملي برنامج زي إللي عايزه ويكون حر.. وبعدين طالما هم بينادوا بالحرية للمستخدم فمن حرية المستخدم إنه يكون حر في تشغيل أي برنامج، زي ما البرامج الإحتكارية بتسمح بتشغيل البرامج الحرة، يبقى البرامج الحرة تسمح بتشغيل البرامج الغير حرة.

3. زي ما قلت في الأول إنهم بيميلوا للقيم ومثالية زيادة عن اللزوم في موضوع الحرية ده، وإللي من الصعب تطبيقه في كل شيء، ممكن يعمم على أغلب البرمجيات، بس هيفضل في برمجيات غير حرة ومش هتقدر تبقى حرة، يعني حاجة زي الهايسيس ده ( معلش بقى التخصص بيغلب على الواحد) لا اعتقد ابداً إن شركة أسبن ممكن تفتح مصدره وتتيح كوده للناس..!!!

4. برضو من ضمن تشددهم اللي مش بالعه، إنهم مثلاً في البرمجة، لو اخذت برنامج مفتوح المصدر وعدلت عليه واضفت ليه، لازم اتيح النسخة الجديدة برضو بنفس الإتفاقية وإللي بتلزمني إني افتح كود البرنامج بما فيه التعديل إللي أنا عملته.. طب البرنامج الأول ماشي عشان هو أصلاً حر فلازم يفضل حر، لكن افرض إني مش عايز أكشف الكود للإضافات إللي أنا وضعتها، مش أنا برضو حر أظهرها أو لأ؟؟

مع وجود ملاحظاتي دي على البرمجيات الحرة، لقيت حاجة تانية وهي مبادرة المصادر المفتوحة، وإللي بعتبرها تعديل للبرمجيات الحرة عشان تبقى على مزاجي ((:

بس بصراحة أنا شايف إن التدوينة بقت طويلة شوية، فكفاية كدة وهبقى أكمل المرة إللي جاية...

أشوفكم هناك

عذراً دوت نت

السلام عليكم ورحمة الله وبركاته،

مش عارف ليه وأنا بـ اقرأ التدوينة إللي فاتت بتاعت (عايز أبرمج) حسيت إن كلامي عن الفيجوال دوت نت كان مش ولابد – وإن كان من غير قصد – بس لاقيت إنه ممكن يتفهم غلط فحبيت أوضح العملية شوية.

في البداية، أنا طبعا لسة عند كلامي وهو إن الفجوال دوت نت تعتبر سهلة جداً – أو ذي ما قلت سهلة بوئلة – بس مش المقصود إنها مثلاً لغة أطفال وتدوس على بطنها تسقف وكلام من ده، بس المقصود إنها فعلاً من أسهل اللغات الموجودة حالياً، فالحاجة المتعبة في الفيجوال 6 مثلاً بتعملها بسرعة وسهولة أكبر، لكن في الأول والآخر دي لغة برمجة، يعني جمل بنائية وطرق ودوال وكلام من الخنيء ده.

تاني حاجة وهى لمّا قلت إنها بتاعت تطبيقات نت وبرامج موبايل، ده مش تقليلاً لكفاءة اللغة ولا حاجة، بس ده يعتبر إللي بدأ يميزها عن الفيجوال 6، وهو إنها أسهل وأحسن في المجال ده، بس برضوا بتعمل الشغل التاني بتاع الفيجوال6 وعادي يعني.

أختم بحاجتين، أولهما: الفيجوال دوت نت جديدة وسهلة وبدأت تطغى على فيجوال6، وخصوصاً بعد أن توقف دعم مايكروسوفت لفيجوال6، لكن ذي ما اتفقنا الحلو ما يكملش، ومفيش لغة ملهاش عيوب.

تانيهما: وإن كنت من مستخدمي فيجوال6، بس لو حد محتار بين 6 و دوت نت، فأنا بأنصحه بالدوت نت – أسهل وأحدث و... – وذلك إن كان لم يتعلم شىء في الفيجوال6، وإلا فلها حسابات اخرى، وعموماً فإن أي شخص بيشتغل مع لغة برمجة عارف كويس الجملة دي: " لو كانت اللغة x تلبي طلباتك فكن مبرمجاً للغة x ، وإن كانت اللغة x لاتلبي طلباتك فلاتكن مبرمجاً للغة x ".

خلصت الختمة، والسلام عليكم.

عايز أبرمج

السلام عليكم ورحمة الله وبركاته،
عايز أبرمج، عايز اعمل برامج، نفسي أتعلم لغة برمجة، ...
حلم جميل أصبح يراود رؤوس الكثيرين، خصوصا في ظل عصر التكنولوجيا والتطور المذهل للإلكترونيات، وانتشار الكمبيوتر في كل مكان واقتحامه لمعظم المجالات وحتى ابسط متطلبات الحياة البسيطة.
كفاية بقى نحوي... المهم، الموضوع ده بجد انتشر وبقى فيه ناس كتير عايزة فعلا تتعلم البرمجة بس مش عارفة إزّاى، وتبدأ منين...
طبعا من غير فزلكة، إللي عايز يتعلم برمجة يعني عايز يتعلم لغة برمجة – فقيق أنا – بس المشكلة إن كتير مش عارف يتعلم أي لغة بالظبط.
لغات البرمجة بقت كتير والسؤال الأساسي هو: هي إيه أحسن لغة برمجة؟
طبعا لان أي واحد نفسه يخش فالبرمجة على تقيل ويريح نفسه ويتعلم أحسن حاجة عشان مايوجعش دماغة ويضطر يتعلم كذا لغة أو حتى يلاقي اللغة إللي اتعلمها مش أد كده.
بس للأسف إجابة السؤال ده هي:
مفيييييييييييييشش!!!!!
ممكن ناس تقلب عليا وتقول يا عم ده واد تيت وتقلب الموضوع وتمشي، بس أنا برضو مُصر، لان مفيش لغة فعلا تعتبر هي أحسن لغة.
طبعا ناس هاتنزل بالكلام المحفوظ عن مميزات اللغة إللي بيستخدموها وشايفيين إنها أحسن حاجة:
الفيجوال بيسك: لغة سهلة، اكوادها بسيطة – مقارنة بغيرها – ، بتتفاعل مع ويندوز وتطبيقاته، واجهة مستخدم جرافيك سهلة، ... إلخ
الفيجوال دوت نت: سهلة بوئلة، تطبيقات نت وبرامج موبايل يا معلم، وعيييييييييييش، ... وبرضو إلخ
السي بلس بلس: جامدة مولّة، بتاعت المحترفين والمعلمين التقال، تعمل بيها كل حاجة، فيها توريث و برمجة شيئية، ..... وإلخ برضو
كل ده كلام كويس، بس فيه حاجة صغيرة، زي ما كل لغة من دول ليها مميزات، لازماً وحتماً ولابد يكون فيها عيوب، يا أخي ولو عيب صغير مش كله مميزات في مميزات محسسني إنك بتتكلم عن خضرة الشريفة!!!
فعلا كل لغة ليها عيوب، وممكن تكون عيوب تقيلة كمان.
طب إيه الحل يا فزلوك؟؟
الحل في إيدك أنت، أنت إللي تحدد أحسن لغة برمجة،... بالنسبة ليك.
السؤال إللى مفروض يتسئل هو: أنت عايز تبرمج ليييييييييه؟؟؟
يعني عايز فعلا تبقى مبرمج متخصص وتعمل برامج متكاملة في كل حاجة، وتصميم شبكات، ومالآخر تبقى بيل جيتس.
ولا عايز تعمل باتشات وحاجات تروش بيها على صحابك وتبقى الواد التوتّي فروتّي وخلاص.
حسب دماغك، أنت إللي تحدد اللغة إللي عايزها. يعني اللغة الفلانية لو شايف إنها تحققلك إللي أنت عايزه، خلاص دووس فيها.
من وجهة نظري:
لو فعلاً عايز تبرمج شغل تقيل وشبكات اتصالات وأنظمة تشغيل وبرامج كبيييييرة، ومش فارق معاك تقعد أد إيه تتعلم على ما تحترف، عليك وعلى السي بلس بلس – وربنا يديك ويدينا طول العمر – أو ممكن سي شاب بس مش متأكد من إمكانياتها بس هي أسهل من بلس بلس.
لو عايز تتعلم بسرعة وسهولة، في وقت قليل نسبياً، برامجك معظمها مش معقدة برمجياً – يعني هندسية ومحاسبية إللي اعتمادها بيكون على معادلات مش جمل برمجية – يبقى روح على فيجوال بيسك وأنت مطمن.
لو دماغك برامج بسهولة.. أوي، وشغل نت وموبايلات وحركات، فيجوال دوت نت هى سبيلك.
الجافا مليش فيها ومانصحكش تجربها، إلا إذا كنت تقصد الجافا سكريبت عشان صفحات النت، دي حاجة تانية.
طب وبعدين، آخد الحاجة معيوبة يعني، اعمل إيه في عيوب اللغة إللي اخترتها.
عموما طالما اللغة متناسبة مع دماغك مفيش عيوب كتيرة هتلاحظها، لكن برضو اطمن، كل لغة وراها رجالتها إللي لايمكن يسيبوها.
هتلاقي دايماً أدوات خارجية: تحديثات ومكتبات واشتغلات كتيير اتعملت عشان تعالج العيوب دي، وكل ما تحترف اللغة اكتر فرصتك فالفوز تكبر، اقصد تمكنك منها ومن تخطي العقبات والعيوب بها هايزيد.
كفاية كدة انهاردة أحسن صدعت.
والسلام عليكم ورحمة الله وبركاته.