السلام عليكم ورحمة الله وبركاته،
كيفكم، وإيه الأخبار؟
نخش بقى في الموضوع على طول...
حوار دايماً بيدور بين الشباب، وبخاصة في المرحل الدراسية المختلفة سواء مدارس أو جامعات، وهو يا ترى أنت فهييم ولا حفييظ؟
يعني بتحب تفهم الحاجة ولا تحفظ؟
وبتدور بقى حوارات كتير وتعصب والفهم أحسن.. لا الحفظ أسهل.. أنتوا مابتفهموش.. اهو أنت ... تيييييييييييت.
وعشان أكون صريح من البداية، فأنا من المتعصبين (شوية يعني) للفهيمة، بس ده مش هيقصر على عرضي للموضوع إن شاء الله وهكون حيادي، وهحاول اختصار الموضوع في فقرات قصيرة.
أولاً: ينفع أعيش بالحفظ فقط من غير فهم خالص؟
طبعاً لأ
طب ينفع أعيش بالفهم فقط من غير حفظ خالص؟
برضو طبعاً لأ (مش قولتلك حيادي)
ومثالين بإختصار عشان محدش يعترض على الكلام: حضرتك مينفعش تحفظ إنك لو حاسس بالحر هتشغل المروحة أو تشرب حاجة ساقعة، ومينفعش برضو تفهم اسمك إيه، ولا تفهم تاريخ ميلادك أمتى !!!
أظن واضح.
ثانياً: كل الناس بتعرف تفهم، وكل الناس بتعرف تحفظ، بس طبعاً في تفاوت كبير بين كل شخص والآخر، ففي واحد قدرته على الفهم عالية ولكنه في الحفظ مش ولابد، وفي ناس العكس بتقدر تحفظ كتير وفي وقت قليل بس فهمها برضو مش ولا بد، وفي ناس ما شاء الله عندها الأتنين سوبر (اللهم لا حسد يعني).
فدي قدرات، أحياناً بتكون طبيعية، يعني ده قدر الله وحكمته من إعطائه القدرات دي، وأحياناً أخرى بيكون برغبة شخصية أو كسل أو تعود من الشخص نفسه (وبرضو بقدر الله طبعاً).
ثالثاً: في حاجات لا يصلح لها إلا الفهم، وفي حاجات لا يصلح لها إلا الحفظ، وده تقريباً وضح من المثالين في أولاً.
وهنوضح من خلال أمثلة في العلوم الدنيوية والدينية أيضاً.
يعني المعلومات التاريخية، تواريخ وأسماء أشخاص، الأدب شعر بقى ونثر، اللغات كلماتها وتعبيراتها ... إلخ كل ده مينفع يتفهم، وماينفعش غير إنه يتحفظ.
الأيات القرءانية والأحاديث وسير العلماء، محتاجة برضو للحفظ.
ومن ناحية أخرى، تطبيق النظريات الرياضية لازم يفهم، التخطيط لمشاريع وتصميم أي شيء (وحدات صناعية، منازل، دائرة كهربائية). كل ده لازم يتفهم وماينفعش يتحفظ.
رابعاً (من أهم نقطتين): محاولة فهم ما يجب حفظه أو حفظ ما يجب فهمه بيودي في داهية.
لأن إللي بيحفظ ما يجب فهمه بيحط نفسه في مأزق من غير ما ياخد باله، لأن مجرد حفظه للحاجة هيخليه يتنح لو أي ظرف أو أي حاجة تغيرت عما كان متوقعه(او عما كان يحفظه بمعنى أصح) يعني لو ملقاش الأمور ماشيا زي ما حفظ، شكراً.
وبرضو إللي هيحاول يفهم ما يجب حفظه، هيضيع وقت طويييييييل، وفي الآخر مش هيوصل للمطلوب. يعني تخيل لو حد حاول يفهم تاريخ قيام الحرب العالمية؟!
خامساً (تاني أهم نقطة): أفهم واحفظ، هتعيش بسهولة.
زي ما قلت في الأول في ناس مصرة على إنها متحفظش أي حاجة، هو بالفعل بيحفظ حاجات وحاجات كتير، بس من غير ما ياخد باله، أو عامل مش واخد باله، وعلى العكس برضو للناس إللي بتحفظ.
وده عين الغلط، لأن زي ما قلت في حاجات لازم تتحفظ، وفي حاجات لازم تتفهم، وفي حاجات عايزة الأثنين، وهما دول المقصودين بالنقطة دي.
لو حاجة محتاجة فهم وحفظ، متكتفيش بأحدهم فقط، لأن ده هيضيع عليك كتير.
كل حاجة حاول تلاقي طريقة للوصول للطريقتين معاً، دا هيخليك متمكن أكتر منها.
احفظ التاريخ وأحداثه، بس حاول تفهم الأحداث وأسبابها وما أدت له...
احفظ المعادلات والقوانين (القليل منها من وجهة نظري)، بس لازم تفهم إزاي تتمكن من تسخيرها لاستخدامها
احفظ القرآن، بس افهم المقصود من الآيات ومعانيها ودلالاتها
...
الخلاصة، الحفظ ممكن يكون أسهل، بس مش عند كل الناس، والفهم كذلك
الفهم ممكن يكون أكثر ثباتاً وميتنسيش بسرعة، بس برضو مش عند كل الناس
سواء فهم أو حفظت، المهم تعرف إزاي تستفيد من العلم إللي تحصلت عليه بأي طريقة كانت...
