السلام عليكم ورحمة الله وبركاته
إيه الأخبار؟ تمام...
طيب الحمد لله... ونخش بقى في الموضوع.
طبعاً كلنا ملاحظين وعايشين مع بعض التطور والإنتشار الكبير للقنوات الفضائية الإسلامية، وإلي من ضمن ما قد ساهمت في زيادته هو الأناشيد الدينية، سواء كانت القنوات دي بتعرضه بين فقراتها وبرامجها المختلفة، أو النشيد نفسه بيكون تتر لمقدمة/نهاية البرنامج، وده شيء جميل والحمد لله وهي بديل طبيعي للحاجة الغنائية عندنا.
المهم إن مع إنتشار الأناشيد دي، بدأ استخدام الأصوات البشرية كخلفية للإنشاد لكي تضيف جمالاً للنشيد، وتكون بديلاً عن استخدام الموسيقى، وده برضو شيء كويس وجميل.
طب أنت إيه إللي مزعلك؟
أنا مفيش حاجة من إللي فاتت ده مزعلاني، ولكني بدأت من فترة ألاحظ تتطور كبير جداً في هذه الأصوات البشرية وبمساعدة المؤثرات الصوتية حتى إني بالفعل بعض هذه الأناشيد أو تترات البرامج عندما سمعتها أحسست أنها موسيقى حقيقية وليست مجرد أصوات ناس، وده يدل على مدى التقدم والتقنية العالية المستخدمة والإتقان في التفنن و ..... لأ
أولاً: أحب أوضح إني مش كاتب التدوينة دي لعرض أو مناقشة قضية حكم الأغاني المصاحب لها موسيقى، أو حكم الموسيقى بوجه عام، ولكن أنا كاتب التدوينة دي لعرض تساؤل عن هذا الموضوع ولكن من زاوية أخرى.
دلوقتي الناس إللي بتحط أصوات بشرية بدل الموسيقى، ماهو يا إما شايف إن الموسيقى حرام عشان كدة بيستخدم أصوات بشرية بدل منها، أو موضوع الموسيقى ده مش فارق وإنما هو شايف إن الأصوات البشرية دي في خلفية الغناء أو الإنشاد بتكون أحسن وأحلى فعشان كدة بيستخدمها.
طيب، هنمسك حاجة حاجة:
نبدأ بالشخص التاني، وإللي العملية معاه مش حلال وحرام، وإنما الحكاية إن الأصوت البشرية هو شايف إنها بتدي أداء وجو أحلى من الموسيقى، فلما يجي هو يستخدم الأصوات البشرية ويعدل عليها ويمكسها لحد ماتبقى زي الموسيقى بالظبط، تبقى كدة فرقت إيه؟ وراحت فين الحلاوة إللي فيها وإلي بتميزها عن الموسيقى؟؟ ولزمتها إيه اتعب نفسي وأنفخ الناس معايا لما هي كدة كدة هتطلع زي الموسيقى والناس مش هتقدر تفرق بينهم؟؟؟
أما بالنسبة للشخص الأول: فهو شايف إن الموسيقى حرام ولا يجوز استخدامها والسماع إليها، شيء جميل، طب هي فرقت إيه الآلة الموسيقية عن صوت البني آدم لما أنت رحت جاي ومظبطها ولاعب فيها لغاية لما بقت زيها زي صوت الألة؟ يعني لما اسمع تتر لبرنامج ما ولولا إن القناة تصرح دائماً بعدم استخدام الموسيقى، وأنا ألتمس فيهم الصدق، أنا كنت مستعد أقسم على أن هذا الصوت هو موسيقى وليست أصوات بشرية.
طب هو الشخص ده سمع عن حاجة أسمها البيت بوكس beat box، ده يا سيدي بإختصار الناس إللي بتعمل أصوات موسيقية ببقها وبس، بصوته بيقدر يقلد صوت أي آلة، وعليه بيقدر يعزف أي موسيقى، وبوجود أكثر من شخص من دول مع بعض أو شخص واحد ولكن على كذا مرة بيقدر يعمل صوت موسيقي زي الموسيقى الحقيقية بالظبط، وهنا السؤال يطرح نفسه، إيه الفرق بين دول؟ وهل أنت يالي أنت شايف إن الموسيقى حرام شايف إن البيت بوكس ده حلال؟؟؟
بصراحة أنا محتار ومش عارف إيه الحكاية بالظبط.
يا عمي لو أنت من الشخص الأول أو الشخص التاني، ففي كلا الحالتين لو هتستخدم أصوات بشرية سيبها زي ما هي، خليني أحس من أول مرة إنها فعلاً أصوات بشرية من غير ما أقعد أركز أوي وأسمع كذا مرة عشان أشوف هي موسيقى ولا بني آدميين...
كفاية كدة بقى أحسن بدأت أسخن
اللهم اهدنا واهدي بنا واجعلنا سبباً لمن أهتدى
آميييييييييييييين
