أإلـه مع الله ؟؟؟

بسم الله الرحمن الرحيم
{ قُلِ الْحَمْدُ لِلَّهِ وَسَلَامٌ عَلَى عِبَادِهِ الَّذِينَ اصْطَفَى آَللَّهُ خَيْرٌ أَمَّا يُشْرِكُونَ (59) أَمَّنْ خَلَقَ السَّمَاوَاتِ وَالْأَرْضَ وَأَنْزَلَ لَكُمْ مِنَ السَّمَاءِ مَاءً فَأَنْبَتْنَا بِهِ حَدَائِقَ ذَاتَ بَهْجَةٍ مَا كَانَ لَكُمْ أَنْ تُنْبِتُوا شَجَرَهَا أَإِلَهٌ مَعَ اللَّهِ بَلْ هُمْ قَوْمٌ يَعْدِلُونَ (60) أَمَّنْ جَعَلَ الْأَرْضَ قَرَارًا وَجَعَلَ خِلَالَهَا أَنْهَارًا وَجَعَلَ لَهَا رَوَاسِيَ وَجَعَلَ بَيْنَ الْبَحْرَيْنِ حَاجِزًا أَإِلَهٌ مَعَ اللَّهِ بَلْ أَكْثَرُهُمْ لَا يَعْلَمُونَ (61) أَمَّنْ يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَإِلَهٌ مَعَ اللَّهِ قَلِيلًا مَا تَذَكَّرُونَ (62) أَمَّنْ يَهْدِيكُمْ فِي ظُلُمَاتِ الْبَرِّ وَالْبَحْرِ وَمَنْ يُرْسِلُ الرِّيَاحَ بُشْرًا بَيْنَ يَدَيْ رَحْمَتِهِ أَإِلَهٌ مَعَ اللَّهِ تَعَالَى اللَّهُ عَمَّا يُشْرِكُونَ (63) أَمَّنْ يَبْدَأُ الْخَلْقَ ثُمَّ يُعِيدُهُ وَمَنْ يَرْزُقُكُمْ مِنَ السَّمَاءِ وَالْأَرْضِ أَإِلَهٌ مَعَ اللَّهِ قُلْ هَاتُوا بُرْهَانَكُمْ إِنْ كُنْتُمْ صَادِقِينَ (64) }
...
سورة النور 59:64
...
لوسمحت اقرأها تاني

عايز تسطب HYSYS بالكراك .... ؟؟

السلام عليكم ورحمة الله وبركاته،
مش عارف ليه الناس عملاها مشكلة إنهم يسطبوا ال HYSYS ويحطولوا الكراك بتاعة.
أنا سبق وحطيت لينك للموضوع ده على مدونة أحمد عبد القادر بس تقريباً كان فيه مشكلة بس إللي يخش المدونة ويعمل search على HYSYS يلاقي الموضوع.
ويعدين من غير شرح ولا دياولو الموضوع مش محتاج اصلاً.
كل الحكاية إن الناس مابتسمعش الكلام....
ياعم سطب البرنامج ذي أي برنامج تاني وبعديين.. هي دي المشكلة
يا جماعة نبوس أديكو محدش يفتح البرنامج قبل ما يحط الكراك
تاني محدش يفتح البرنامج قبل ما يحط الكراك
كمان مرة محدش يفتح البرنامج قبل ما يحط الكراك
بس وحط الملفات ذي ما بيقولك
وعشان الناس إللي بيتوهو فالملفات أنا عملت باتش صغنتوت كدة يحطلك الملفات في مكانها... يلا إن شا الله ماحد حوش
اللينك بتاع الباتش أهو
يبقى معدش عند حد أي حجة
سطب البرنامج،
أوعى تفتحه،
نزل الباتش،
فك الضغط،
كليك على HYSYS ،
ألف مبروك
أظن كدة معدش في كلام يتقال ،
سلاااام

الطرطور

السلام عليكم ورحمة الله وبركاته،
عارفين يا جماعة الطرطور؟
طبعا واحد هايقولي ده القرطاس الكبير ده إللي العيال بيلبسوه على راسهم، وممكن واحد تاني دماغو تروح للشابوه بتاع الطباخين.
بس أنا قصدي على طرطور تاني خاااالص...
طرطور بيتكلم, وبيمشي, وبياكل, وبيشرب,
طرطور له إدين ورجلين وعنين وبوء... بس يا خسارة رغم كل ده برضو ملوش لزمة ذي الطرطور العادي.
أكيد فهمتوا هو ميين؟؟؟ ... بالظبط هو ده.
إللي خلاني اتكلم فالموضوع ده هو الواقع الأليم إللي احنا عايشينو، ولو عايز، تقدر تقول واقع ابييح، ايوه ابييح.
ظاهرة غريبة جدا وهي اختفاء الشعور والاحساس بأي حاجة من عند كتير من البنات (إلا من رحم الله) ، مفيش شعور بالخجل، ولا الكسوف, ولا وجع الضمير , ولا شعور بالغلابة إللي ماشيين جنبهم فالشارع، ولا حتى شعور بالبرد؟!!!
آه والله حتى البرد (برودة الجو يعني) معدوش حاسين بيها. تلاقي الجو تلج والواحد لابس الدولاب كله ومتكتك في بعضه ودي ماشيا ولابسة بنطلون وبدي ...... وبس.
أنا نفسي اسأل واحدة فيهم سؤال واحد بس: أنتي مش بردانة؟ ولّا انتي كدة بتدفي وإحنا مش واخدين بالنا؟؟
المهم – لأن موضوع اللبس دة هنكتبله بوست مخصوص- إن أنا كل ماشوف واحدة كدة – وما أكثرهم في كل مكان – ارجع وأقول ماهو الطرطور إللي فالبيت لو ماكنش طرطور ماكنش سبها كدة.
يا جماعة الطراطير كترت أوي في البلد، السوق المصري أتغرق بشحنة كبيرة من الطراطير، وللأسف كلها مصرية 100%.
الطرطور من دول يمشي يبص فالشارع على إللي رايحة وإللي جاية ويقول ربنا يخرب بيوتكم هاتودوا الشباب في داهية.
ماهو يا طرطور يا بن ال.... (ولا بلاش الأهل) أنت وإللي زيك السبب.
طبعا الطرطور مش هو السبب الوحيد، بل الأسباب كتييير، ولكن.. تعددت الأسباب والطرطور واحد.
بجد أنا مش عارف أزاي واحد ممكن يسيب بنته (أو مراته أو ..... إلخ) تمشي في الشارع بالمناظر اللي بنشوفها فالشارع دي. دي حاجة تفضح إللي ما يتفضحش.
ويرجع الواحد فيهم يقول : إما إن "البنت كبرت ومش قادر عليها" ، وده طبعاً مش عذر بل بالعكس ده كدة يزود طرطوريته لأنه سيبها كدة من زمان ، طب كنت فيين قبل ما تكبر البت؟ وبعدين هي يعني كبرت عليك؟؟ آه؟! يبقى أنت طرطور.
ممكن واحد تاني يقول: "أصل أمها هي السبب" ... يا حالوتك، وهو أنت عايز تاخد مانجا من شجرة جميز؟ لازم يا جميل ذي ماتبطل الطرطورية على البت تشوف الأول أمها.
واحد كمان يقول: "مالها البت ماهي ذي الفل ومجريا شباب البلد كلهم وراها، وبعدين يا أخي سيب البت على حريتها هي حرة ومسئولة عن إللي هايحصل؟؟".... دا بئا طرطور كبييييييير.... بس مترجعش تعيط.
وأخيراً واحد طبعاً يقولك: "وأنت مال أهلك!!!"
المشكلة كمان إن في ظاهرة منتشرة وأنا لاحظتها وهي البنت المؤدبة بنت الطرطور... يعني إيه؟!
تلاقي البت ماشيا ياعيني عليها، كفتة خالص لا ليها فالطور ولا فالطحين، بس برضة لابسة من غير هدوم!!!!
ولو سألت الواحدة من دول تقولك حاجة من دول:
الأولى: "اصل أنا نفسي أتجوز وأول ما أتجوز هلم نفسي" . هأ إبا قابلني: طبعا لأن إللي هيتجوزها وهي كدة أكييد برضه طرطور، طبعا ماهو مفيش هبلة منهم تحاول تقنع نفسها إن واحد محترم هايبصلها وهي كدة على جواز....إنسي يا توتو.
هو طبعا كتييييييييييييييييييييييييييييير ممكن يبصلها، ويمشي معاها كمان، بس ميييين إللي هايشيل الليلة؟؟!!! أخلع يا معلم ..
الثانية: "ذيي ذي غيري، البنات كلهم كدة ودي الموضة يا مان، كل إللي يعجبك وإلبس إللي يعجب الناس، بطلوا تزمت بئا".
ودي طبعا كتيير منها أوي، وبرضوا الطرطور الكبير- معلش هانتعبك معانا- شاييل الليلة لأنه لو ربّاها صح كانت عرفت إن المثل الصح هو كل إللي يعجبك وإلبس برضوا إللي يعجبك. لأن الناس كدة كدة بتتكلم وكمان إللي مش عاجب الناس دول اكيد عاجب الناس التنيين.
التالتة: "والله أنا مكسوفة بس اعمل إيه لازم أبقى ذي صحباتي عشان مبئاش شاذة عنهم، وبعدين بابا و ماما مابيقولوش حاجة" (دي المؤدبة بنت الطرطور).
ودي برضو نقولها ذي مافي بنات قالعين في بنات لابسيين الدور والباقي عليكي عايزة تبقي اييييه؟
الرابعة والاخيرة : "وأنت مال أهلك"!!! برضوا تاني. يظهر من نفس العيلة.
زهئتو مني؟ معلش
طب أنا عايز أقول إيه؟
أولاً للطرطور: عيب عليك يا طرطور تسيب بناتك كدة (والوكسة الأكيدة إنك أكييد سايب مدام طرطور كدة برضوا)
عييب عليك وحاول تبقى راجل بجد لان الطرطور مجرد ذكر، حتى مايستهلش أقوله دكر لان دكر فيها شوية رجولة، لكن أنت كدة مجرد ذكر.. طرطور ذكر.
افتكر لما أنت بتشوف واحدة كدة فالشارع – غير مراتك طبعا- أد إيه بتتفتن بيها، وافتكر إن بنتك بتفن برضه.
ما تعدش تقولي دي كدة محترمة عن غيرها كتيير وتصييع عليا، لأن أنت عارف إن برضو فيه اكتر منهم محترمين عن بنتك بكتيير.
افتكر إنك مسئول عنها وهاتتحاسب على كدة (قال رسولنا الكريم صلى الله عليه وسلم: ألا كلكم راع وكلكم مسؤول عن رعيته)
افتكر حر جهنم وخاف على نفسك وعلى بنتك منها.
وأنتي يا بنت الحلال – اه ماحنا برضوا محسنين الظن بالناس – مالكيش دعوة بالناس وخليكي مع رب الناس.
الجواز رزق من عند الله، وما عند الله لا يطلب بمعصيته.
الموضة مش هاتنفعك، وصحباتك القالعين مش هاينفعوكي، وأبوكي لو كان طرطور برضة مش هاينفعك والناس كلها محدش بينفع حد (كُلّ نَفْسٍ بِمَا كَسَبَتْ رَهِينَة).
وخودي بالك إن كل كلمة اتقالتلك او قرأتيها فهى عليك حجة يوم القيامة
واديني باقولك تاني أهو :
قال تعالى: (قُلْ لّلْمُؤْمِنِينَ يَغُضّواْ مِنْ أَبْصَارِهِمْ وَيَحْفَظُواْ فُرُوجَهُمْ ذَلِكَ أَزْكَىَ لَهُمْ إِنّ اللّهَ خَبِيرٌ بِمَا يَصْنَعُونَ. وَقُل لّلْمُؤْمِنَاتِ يَغْضُضْنَ مِنْ أَبْصَارِهِنّ وَيَحْفَظْنَ فُرُوجَهُنّ وَلاَ يُبْدِينَ زِينَتَهُنّ إِلاّ مَا ظَهَرَ مِنْهَا وَلْيَضْرِبْنَ بِخُمُرِهِنّ عَلَىَ جُيُوبِهِنّ وَلاَ يُبْدِينَ زِينَتَهُنّ إِلاّ لِبُعُولَتِهِنّ أَوْ آبَآئِهِنّ أَوْ آبَآءِ بُعُولَتِهِنّ أَوْ أَبْنَآئِهِنّ أَوْ أَبْنَآءِ بُعُولَتِهِنّ أَوْ إِخْوَانِهِنّ أَوْ بَنِيَ إِخْوَانِهِنّ أَوْ بَنِي أَخَوَاتِهِنّ أَوْ نِسَآئِهِنّ أَوْ مَا مَلَكَتْ أَيْمَانُهُنّ أَوِ التّابِعِينَ غَيْرِ أُوْلِي الإِرْبَةِ مِنَ الرّجَالِ أَوِ الطّفْلِ الّذِينَ لَمْ يَظْهَرُواْ عَلَىَ عَوْرَاتِ النّسَآءِ وَلاَ يَضْرِبْنَ بِأَرْجُلِهِنّ لِيُعْلَمَ مَا يُخْفِينَ مِن زِينَتِهِنّ وَتُوبُوَاْ إِلَى اللّهِ جَمِيعاً أَيّهَا الْمُؤْمِنُونَ لَعَلّكُمْ تُفْلِحُونَ ) سورة النور – الآية 30:31
وفي النهاية أتمنى أن تختفي ظاهرة الطراطير من حياتنا تماما، ويرجع الرجالة تاني رجالة، ونعود جميعا إلى الحق وإلى طريقنا المستقيم.
لما توصل - أو توصلي - للسطر دة فالغالب إن أنت – أو أنتي- قرأتو الموضوع... بسرعة ادعولي باللي يجي على بالكم من الخير.
اللهم اغفر لنا ولوالدينا وللمؤمنين والمؤمنات،
اللهم جنبنا الفتن ما ظهر منها وما بطن..... آآآمييين..... قولو أنتو كمان آمين
والسلام عليكم.

شرح HYSYS يا معلميين

السلام عليكم ورحمة الله وبركاته,

ذي ماأتفقنا من غير لت وعجن كتيير, دي مجموعة فيديوهات عن تعلم برنامج الـ HYSYS من عمل العبد لله - أنا -

قبل ما تشوفوا الفيديوهات أحب أقول حاجات:

1. البرنامج للمهندسين الكيميائيين ومهندسي البترول ومن شابههم , فلو انت غير كدة - مع احترامي- ما تتوقعش استفادة كبيرة.

2. بالنسبة لشغل الهندسة نفسه من (عمليات مشتركة unit operation , وهندسة غازات gas processing , .. إلخ) أنا مش مسئول عنه, يعني ما تتوقعش إن أنا هأقعد اشرحهم ليك الاول..... صعب , دة شرح لل HYSYS وبس, ممكن حاجة كدة على الماشي بس مش كل حاجة (ما أنا برضوا على قدي).

3. الفيديوهات مش إحترافية, يعني لو فيه غلط, عديها.

دلوقتي دور الفيديوهات:

1- الفيديو الأول:

شرح لمعنى simulation ومقدمة لبرنامج HYSYS

2- الفيديو التاني:

بداية العمل في البرنامج مع مثال عن ال gas processing

3- الفيديو التالت:

الجزء التاني من المثال السابق gas processing

4.الفيديو الرابع:

الجزء التالت والاخير من مثال الـgas processing

الحمد لله تم رفع الفيديوهات بجودة عالية (avi) على روابط مباشرة

الجزء الأول (المقدمة)

الجزء التاني (بداية مثال الغاز)

الجزء التالت (تكملة المثال)

الجزء الرابع (آخر حاجة في مثال الغاز)

بالنسبة لتسطيب البرنامج مع الكراك الأخ والزميل والصديق العزيز : أحمد عبد القادر ، عامل فيديوهات عن الموضوع ده وكمان فيديوهين شرح حلويين، ممكن تشوفو ده على مدونته الخاصة

http://http//sacandary.blogspot.com/search?q=hysys

ارجو الاستفادة للجميع , ولا تنسوني من صالح دعائكم.

والسلام عليكم.

دي حياتي ...

السلام عليكم ورحمة الله وبركاته,
على طول ومن غير مقدمات, دي أول مرة أكتب فيها على المدونة يعني من الآخر تعتبر افتتاحية.
في البداية أحب اقول إن الهدف الاساسي من إنشائي للمدونة هو الرغبة في عمل شيء اقدم فيه ما استطيع لمساعدة الآخرين في كافة المجالات إللي بعرف فيها (على اساس إني بعرف في شوية حاجات كدة) وطبعا من غير لت وعجن الحاجات إللي بعرفها إنتو (أنتم) كمان هتعرفوها لما تتنشر فالمدونة (كل شيء في وقته).

أما بالنسبة لاسم المدونة فانا استوحيته من اعلانات { هذا ديني.. هذه حياتي }
وبما أن ديني هو كل حياتي ... فهذا ديني= هذه حياتي= دي حياتي (بالبلدي يعني).
وطبعا باقي ما هو يتعلق بحياتي.... فده تفكيري, وده تعليمي :) , .. وهكذا.

أه صحيح أنا نسيت أقول أنا ميين..... ؟
تقدر تشوف البروفيل (:

طبعا بما إني جديد فالكار (كار المدونات يعني) فمتتوقعوش شغل محترفين , لالالالالا خالص ...
يعني ابسط من البساطة المتبسطة في كل البساطات.

كدة كفاية انهاردة وارجو أن اقدم ما يفيد بالفعل واسأل الله الإخلاص
و السلام عليكم