السلام عليكم ورحمة الله وبركاته،
مش عارف ليه النقاب بقى قضية كبيرة أوي، يعني شيخ الأزهر د/ طنطاوي صرح بعدة أقوال – ورغم إننا معترضين عليها بس لازم ماننساش للشيخ علمه ومكانته إللي بتحتم علينا احترامه – وقام مشايخنا الأفاضل من العلماء المعتبرين بالرد على مسألة النقاب وبيان الحق من كتاب الله وسنة نبيه صلى الله عليه وسلم، وخلصت القضية.
وأنا هنا طبعاً مش عشان اتكلم في حكم النقاب ومناقشة الآراء الفقهية المختلفة ولكن إللي خلاني اكتب التدوينة دي إني لاقيت الموضوع مصممين على تضخيمه.
فبعد شيخ الأزهر قامت وزارة التعليم العالي لتعلن عن منع دخول الطالبات المنتقبات للمدن الجامعية، وبعدها بشوية قرروا منعهم من دخول لجان الإمتحانات بالنقاب، وشعللوا الموضوع تاني...
وبعدين، ولا حتى دي من قبلهم كلهم وزارة الأوقاف التي تتبنى نشر الموضوع وتصر على إقناع الناس كلهم بأن النقاب ليس من الدين في شيء، حتى قرأت أن الوزارة صرفت ملايين من الجنيهات على هذه الحملة والتي شملت طبع كتاب " النقاب عادة وليس عبادة" وعمل ذي حملة كدة تلف على فروع الوزارة لعقد ندوات للعاملات فيها لتقنعهم بخلع النقاب لأنه ليس من الدين – كما يقولون - ...
وأخيراً لسة أمبارح سمعت إن مجمع البحوث الإسلامية في مصر أصدر قراراً يؤيد فيه قرار منع الطالبات المنتقبات من دخول المدن الجامعية والإمتحانات في المعاهد الأزهرية، ولما سأله المذيع أحد أعضاء المجمع عن سبب قيام المجمع بإصدار مثل هذا القرار قال" لأن النقاب ليس من الدين في شيء بل مجرد عادة" وقال " ونحن نريد أن نعلم الناس دينهم الصحيح" وقال أيضاً " أنا أتحدى أي أحد أن يأتي بحديث صحيح يثبت أن النقاب من الدين"...!!!
وذي ما قلت أنا هنا مش عشان أرد على حد ولا أحلل الآراء و أوضح الأدلة على أن النقاب على الأقل من الدين وليس بدعة ولا عادة، ولو كنت عايز تسمع كلام عن الموضوع ده عليك بما قاله بالعلماء:
بس أنا إللي مضايقني إن الموضوع تضخم أوي وشايف فيه شبه عناد..
يعني كام مسئول وكام وزارة وكام مؤسسة كبيرة أصدرت قرارات و تكلمت في الموضوع...
ولو كان فعلاً الدافع – كما يقول عضو المجمع – هو الدفاع عن الدين وحرصهم على تعليم الناس للدين الصحيح،
طب ليه ما شوفناش نص العدد ده من إللي أتكلموا عمل حاجة لما الصحابة – رضي الله عنهم – تم الإعتداء عليهم في بعض الصحف...
ليه محدش منهم اتكلم عما يحدث في الموالد من بدع ودعاء لغير الله بل وذبح لغير الله...
هو عمر ما حد فيهم سمع آلاف من الناس إللي بتبقى في الموالد وهي بتقول " يا سيدي فلان اشفيني " أو أرزقني أو غيره، وعمرهم ما شافوا حد بيدبحلهم...
ليه مفيش حد اتكلم عن لبرتو زفت إللي رايح يجيب مغنية شبه عارية لتقيم حفل فيه...
وهنروح بعيد ليه، سبنا من المستورد وخليك في المحلي، ليه محدش اتكلم عن كباريهات شارع الهرم والعري والفسق والخمور إللي فيها...
ليه وزارة الأوقاف إللي صرفت ملايين عشان تقول للناس إن النقاب ليس من الدين خوفاً عليهم ورغبة في تصحيح دينهم، ليه مصرفتش ربع المبلغ ده في حملة لوقف العري من الشوارع، وليه مفيش كتاب عنوانه مثلاً " التبرج والعري ليس من الدين" ذي ماعملوا كتاب النقاب ليس من الدين...
ليه مفيش حملة وقرارات من بعض الوزارات إللي تكلمت في منع النقاب لمنع التدخين...
يعني مثلاً قرار بمنع التدخين في الجامعات، أه صحيح
أصل أنا رحت الكلية من فترة أخلص بعض أوراق التخرج لقيت في ورقة مكتوب عليها " ممنوع التدخين داخل الكلية، ومن يخالف ستوقع عليه غرامة" وبعدين لقيت واحد واقف جنب الإعلان ده وبيولع سيجارة.
يعني كل إللي فات ده مفيش خوف منه على دين الناس وأخلاقهم
كل ده وغيره مفيش حد عمل معاه حاجة لكن النقاب، أوعى وشك ده أكبر المشاكل
الصراحة حاجة تخنق وتلخبط المخ
الموضوع مش مجرد خايفيين على دين الناس
ولا موضوع النقاب يستغل بصورة سيئة ولا حاجة
إنما فيه حاجة أكبر من كده و غير كده خالص
بس هي أيه بقى... الصراحة مش عارف
6 اكتب تعليقك... فرأيك يهمني:
بس يا مخ الواحد من كتر ما كان بيتابع الموضوع ده كتير الايام اللي فاتت ... حاسس ان دماغي باظت ... وبطلت اسمع اي حاجة من الناس دي ... لا جرايد ولا تليفزين ولا يجزنون ... دي عالم فاضية وعايزة تلعب في دمغة الناس وخلاص ...
وبعدبن اللي انت عارفه صح اعمله وطظ في الناس كلها ...
قال يعني النفاب هو اللي أزمة ... !!!!
يا عم دا الحشيش بيتباع تحت بيتنا !!!
وانت عرف الباقي بلاش كلام فيه احسن !
احسن حاجة ما تسمعش كتير علشان ما تتشتتش ...
ما قل وكفي خير مما كثر والهي ...
سلام
كلامك صح يا قصص، فعلاً الواحد دماغه حمضت من كتر الكلام واللت والعجن
ويمكن ده من الأسباب إللي خلتني أكتب التدوينة دي
الكلام كتيير أوي ويتوه ويشتت وفي نفس الوقت يبعد الناس عن حاجات تانية أهم بكتير
وده إللي قلته إن أكيد الكلام مش مجرد توضيح للحق وإنما في حاجة تانية جعلته يأخذ الصورة التي ظهر بها بس هي إيه...
معاك حق جدا
أبسط حاجة .. بدل الدوشة اللى على النقاب المختلف فيه ليه مش بيتكلموا على التبرج (وسوء الأخلاق والسرقة والرشوة والظلم والفساااااد) المنتشر في البلد ؟
أهو أنا كده اتطمنت .. العلم عمال بيقبض من الأرض بقبض العلماء لغاية ما بقينا نتخذ جهالا علماء !!
والله المستعان
الأخت مها:
والله أنا مش عارف الناس هاتخدنا لحد فيين
ربنا يخلي علمائنا الصالحين الربانيين حتى لا نحتاج لمن يضللنا و يبعدنا عن طريق الحق.
كل داه ليه؟ ليه؟ ليه
مش قادرة أعد كم ليه كتبتها يا مختار ويعلم ربي كلها تساؤلات موجعه للقلب بس جوابها أوجزه في جملة واحده : ابتعدنا عن الدين الإسلامي وهذه هي المحصلة
كلمات من نور، الأم الغالية
فعلاً عندك حق، بعدنا عن ديننا هو إللي مضيعنا، وهنفضل ضايعيين طول ما أحنا راكبين دماغنا ونفضل بعيد.
بس على فكرة، في ليه كتيرة أوي بس مش هلاقي وقت ولا مساحة أعددهم فيها.
ربنا يرحمنا ويتوب علينا
إرسال تعليق