كفاية فشخرة

السلام عليكم ورحمة الله وبركاته،

ظاهرة منتشرة جداً في مجتمعنا، مش بس بين الشباب ولكن بين الكبار أيضاً...

الفشخرة

ولو الكلمة غريبة عليك ممكن تقول عليها المنظرة الزائدة عن الحد أو التباهي الزائد عن الحد أوي أو الإسراف المبالغ فيه.

فعلاً الناس بقى عندها منظرة وفشخرة كدابة ذي ما الناس بتقول، ومع استمرار التقدم التكنولوجي زادت الفشخرة أوي..

يعني لو اخدنا الموبايل كمثال هتلاقي إن كل البشر عندنا بقى معاهم موبايل، سواء له لازمة أو لأ، لحد كدة ممكن تتبلع ونقول انه هيستخدمه كدة كدة في وقت من الاوقات، لكن ليه الناس تصر على شراء أحدث الاجهزة باحدث الامكانيات؟؟

ليه الشاب من دول لازم يكون الموبايل كاميرا آخر حاجة والذاكرة كبيييييييييييييرة وكل الإمكانيات فيه وتليفزيون وكمان له كاميراتان، إلا صحيح هو في حد من إللي عندهم كاميراتان استخدمهم فعلاً للغرض المصنوعة له؟!

لو سألت الواحد من دول عايز كاميراتين ليه هيقولك عشان اعرف اصور نفسي!!!!!!!

دي حقيقة لأن الكاميرا الامامية إنما كانت فكرتها لسهولة إجراء اتصال مصور فيديو (video call)، لكن يا ترى كام واحد عنده الخاصية دي اتكلم فيديو كوول؟

الموبايل هيجنن الناس والصين الحبيبة عرفت دماغ شبابنا عايزة ايه وريحته على الآخر..

الواد من دول عايز يمشي يسمع الناس كلها صوت موبايله – فشخرة يعني- طيب يا سيدي حطله خمس سماعات فالتليفون واعمله تليفزيون فيه كمان.

الواد عايز يتفشخر ذي رجال الاعمال، أوك اعمله الموبايل تتش سكريين وبقلم وحوارات من دي، وهكذا

يعني ممكن الواحد من دول يكون على قد حاله مش غني أوي يعني ومع ذلك ياخد تحويشة كذا شهر ويروح يحطها في موبايل بكذا ألف وتلات تربع امكانياته هو لن يستخدمها ولن تفيده بس هي الفشخرة.

حتى لو كان الواحد معاه فلوس كتيير ومستريح، برضوا لازم يكون عاقل ويصرف الفلوس في مكانها حتى لا يكون من المسرفين.

الناس إللي برة رغم إن هم الذين ابتكروا كل هذه الاختراعات والتكنولوجيا لكن تلاقي كتيير منهم لسة شايل الموبايل أبو اريال، ليه ؟ يقولك أصل أنا مش محتاج حاجة تانية منه!

مثال تاني وهو الملابس... هدومك منين يا معلم،

طبعاً توكيل يا ماااان... اشطة

تلاقي برضو الواحد من دول يفضل يحوش وفالآخر يروح يشتري كوتشي بـ 800 جنيه، طيب أنا هسأله هو الكوتشي ده فيه إيه يستاهل انه يكون بالثمن ده؟

بالإضافة إلى إنه توكيل هيقولك إنه حاجة نضيفة وبتعييش، طيب يا سيدي خليك معايا واحدة واحدة...

الكوتشي أبو 800 الخامات بتاعته والتشغيل والفنش يفرق إيه عن أبو 200 ولا 300؟ ما هو أنا مش هقارن الكوتشي التوكيل بواحد ب 50 جنيه لأن فيه فعلاً فرق لكن الكوتشي مثلاً أبو 200 يفرق إيه عن التوكيل أبو 800؟؟ أنا أكاد أجزم أن الفرق لن يتعدى 100 أو 150 جنيه، يا عم قول 200 جنيه، يعني الكوتشي يصبح ثمنه 400 جنيه، طب والباقي ده بتاع إيه؟؟؟؟

ده يامعلم ثمن التوكيل!!!

أيوه ثمن الماركة إللي محطوطة على الكوتشي ولًا التي شيرت لأن الشركة بتبيع الماركة قبل المنتج فهمت اللوزة.

يعني الكوتشي الـ PUMA غير adidas غير Nike وهكذ، تلاقي نفس النوع بس السعر مختلف لأن الماركة مختلفة وسعرها كمان.

صدقني هي دي الحقيقة، ما تفتكرش إن الحاجة التوكيل دي بتتصنع فالقصر الملكي مثلاً مصنع ذي غيره بس الماركة هي الفرق.

أخر حاجة اتكلم فيها إن ناس كتير شايفة إن إللي معاه فلوس ومايشتريش الحاجات الغالية كلها يبقى بخييل..

هو فعلاً فيه ناس بتبقى بخيلة وبخيلة قوي بس برضو فيه ناس ذي ما قولنا بتبقى فاهمة هي عايزة ايه وتحط فلوسها في ايه سواء كانت الحاجة غالية أو لأ المهم أكون فعلاً محتاجها ومخليش في نفسي حاجة.

اظن الكلام ده مايزعلش حد ولازم كل واحد يشوف هو بيصرف فلوسه في إيه ويفتكر إنه هيتسئل عن ماله فيما انفقه.

كفاية كدة

وسلام